1. Farikponn ghetolea Deva, Sorvespora, sudd ghetolea Deva, ie mukhar.
2. Prithumechea Nitidara, utth, gorvixttank favo ti mozuri di.
3. Kednam porian, Sorvespora, kednam porian noxtte monis jiktole?
4. Te mijas kortat, gorvan uloitat, khotte monis apnnam modem boddai sangtat.
5. Tujê porjek te chêptat, Sorvespora, Tunvem vinchun kaddloleank dogditat,
6. vidvancho ani pordexiancho jiv kaddtat, onath bhurgeank jivexim martat.
7. Voilean mhonntat: “Sorvespor pollenam, Jakobacho Dev chit dinam”.
8. Murkhantleam murkhamnô, somzun gheiat, Arê pixeamnô, kednam tumkam budh iet?
9. Zannem kan ghôddla, Takach aikunk ienam? Zannem dollo rochla, Takach dixtt nam?
10. Zo raxttrank xikxa dita, To khast lavuncho nam? Zo mon’xank zannvai dita, Takach zannvai aschi nam?
11. Mon’xanchim chintnam Sorvespor volkhota, tim bextti funk mhonn To zanna.
12. Sorvespora, jea mon’xak Tum updês ditai, zaka Tuji somurt xikoitai, to monis bhagi.
13. Noxtteank fôndd khonnun zata mhonno-sôr taka Tum vignachea disa somadhan kortai.
14. Kiteak Sorvespor Aplê porjek sôddcho nam, Apnnem vinchun kaddloleank To sanddcho nam.
15. Zhôddti novean niti pormannem zatoli ani sogllim promannik kallzam ti mandun ghetolim.
16. Noxtteam virudh mhoji rakhonn korunk konn ubo zait? Khoteam mon’xam virudh konn mhaka tenko diit?
17. Sorvespor mhojea adarak pavunk naslo zalear, hanv rokddoch Norkant ogo poddtolom aslom.
18. "Mhozo pãi nisorta” oxem hanv chint’tam têch ghoddiê Tuzo maiêmôg mhaka samballta, Sorvespora.
19. Mhojea kallzant huske choddtat tednam Tuji buzvonn mhojea otmeak sukh-sontôs dita.
20. Kaideachea nanvan onit kortat team noxtteam mon’subidaram borabor Tum-i asxi kai?
21. Promannik mon’xanchea jiva pattlean te lagleat, ani niropradi rogtacher xikxê-formonn martat.
22. Punn Sorvespor mhojem Kott’tt, ani mhozo Dev mhojem Khoddop, mhozo Asro
23. Tanchea noxtteponnachem To farikponn ghetolo, tanchea khoteponnak lagun To tancho bhosm kortolo, tancho bhosm kortolo Sorvespor amcho Dev.
