1. Dusman mhojer choddleat, Sorvespora, mhojê vatten ubo rav! Mhojê pattik lagleat: Tum tanchê pattik lag!
2. Tujem kovoch ani ddhal ghe, utth ani mhojea adarak ie!
3. Tuzo bhalo sôddun mar, mhojê pattir ietoleank addaun dovor. "Hanvunch tuzo Tarôk!": oxem mhojea otmeak sang.
4. Mhozo jiv kaddunk sôdtat tankam lojek ghal, tanchem nak katôr! Mhojer vaitt ievjitat tankam dhanvddai, tokli pondak ghalun tankam pollun vochum-di.
5. Sorvesporacho dut tankam dhanvddaita tedna pola vori te varear ubun vochum!
6. Sorvesporacho dut tankam dispottaita tedna kallkhê ani nisortê vatten te pollun vochum!
7. Karonna vinnem mhaka tãnnim zall manddlem, mhozo jiv kaddunk fôndd marlo.
8. Dekhun okosmat tanchem ghorttann zaum, mhaka manddlolea zallant tech farom, mhaka marlolea fonddant tech poddum.
9. Tedna mhozo otmo Sorvespora sovem sontostolo, Tannem mhojem taronn kelem mhonn murgott’tolo.
10. Mhojim haddam legun oxim ul’lastolim: "Tujê sarko dusro konn, Sorvespora? osokt-goribak bollixt mon’xanchea hatantlo Tunch nivartai, dolldireak luttnnaranchea chopkeantlo Tunch soddoitai."
11. Kitlech zonn lottik govai diunk ube zata, mhaka khoboruch naslolea opradam vixim firiad ditat.
12. Borem kel’leak portun mhaka vaitt kortat; mhojem kalliz sarkem eksurem zalam.
13. (a)Tori te piddent asle tedna, (13b)hanv mhogelo dukh kaddtalom;(13c)upas korun kuddik donddvonn ditalom; (13d)tanchê pasot mhojea kallzant prarthnam korit aslom;
14. (a)ixtta vô bhava pasot zal’lê porim (14b)zoso put somplolê avoik roddta, toso hanv tondd kallem korun khontin doddon bhonvtalom.
15. Punn atam mhoje pãi nisorle mhonnun te khuxi zaun ektthaim zale, ektthaim zaun mhaka challvounk lagle, okosmat, bobô marun,mhaka pinzunk lagle.
16. Mhaka kunsam lait asat ani ragan dant kirlun thambonastana mhojeô moskoriô kortat.
17. Saiba, kedna porian vogich polletoloi? Tanchea ghansantlo mhaka sôddoi, hea xinvanchea chopkeantlo mhozo jiv vattai!
18. Vhoddlê Sobhent Tuka dhin’vastolom, lokachi zomat bhòrta tedna Tuji tust kortolom.
19. Fottkirea mhojea dusmanank mhojê voir nachunk dium naka. Karonna virêt mhaka zolltat tankam mhoji beporva korun dolle môddunk dium naka.
20. Tanchim utram xantichim nhoi, desantlea xant monachea mon’xancher lochanddam manddtat;
21. Tondd uktem korun mhojea tonddar martat. "Chol rê tum! Ami tujem sogllem zannonv!"
22. Atam, Sorvespora, vogi ravum naka, Tum-i sogllem zannoi! Mhojê sorxilo pois sorum naka.
23. Utth! Zago za! Mhaka rakhunk ie! Mhaka samballunk ie, Dhonia, mhojea Deva!
24. Tujê niti pormannem, Sorvespora, mhoji zhôddti korun di! Mhojea Deva, mhoji gôt polleun tankam hansunk dium naka!
25. Aplea monant tankam chintunk dium naka: "Hoi rê! amkam zai toxem zalem!" Tankam mhonnunk dium naka: "Ami taka khaun uddoilo!"
26. Mhojem nirbhag polleun khuxi zatat tankam soglleank lojek ghal, tancho man bhongoun uboi; mhojer pãi dovrun choddtat fultat tanchem nak katrun uddoi, tancher xirap poddum!
27. Mhaka nit mell’llolê khatir sontostat tankam anond ani sukh. Sodanch tãnnim mhonnchem: "Bhov vorto amcho Sorvespor! Aplea sevokak xanti mell’llolean To Apunnuch khuxi zata!"
28. Ani mhoji jib Tujem promannikponn gazoitoli, dis-bhôr Tuji tust kortoli!
