1. Sorvespora, mhojea Deva, dis-bhôr Tuka ulo martam, ratcho tujê mukhar rudon korit asam.
2. Mhojem magnnem pavum Tujê mukhar mhojea rudonak kan di.
3. Mhozo otmo soglloch vaittam-vignank sampoddla, mhozo jiv sarko Norkachê deger pavla.
4. Fonddant denvloleam vori hanv zalam, sogllem mhojem boll virun gelem.
5. Mel’leam modem mhaka soddun sôddla, jivexim marloleam ani somadhimnim purloleam modem hanv poddlam. Osleancho Tum ugddas dhorinai, Tujea hatantlim tim bhair poddleant tanchê sarko hanv zalam!
6. Khôl, khôl khonddant, Patallachea kallokant, Tunvem mhaka xevttilai.
7. Mhojer bosla Tujea ragacho bhar, Tujeam Iharanchea lottant hanv polle buddtam!
8. Mhojeam ixttant Tunvem mhojê sorxile pois kaddleai, tankam mhozo kanttallo haddlai, bondkhonnint poddlam mhojean bhair sorum nozo;
9. khontin-dukhin mhoje dolle gele suzun. Dis-bhôr Tuka ulo martam, Sorvespora, Tujê mukhar hat zoddun ravtam.
10. Mel’leam khatir Tum kitem vismitam kortoloi? Mel’leanchô savlliô utthun Tuji tust kortoleô kitem?
11. Fonddant Tujea bholeponnachi khobor konn korta? Nisonttonachea zagear Tujea visvaxiponnachi gozal konn korit?
12. Kallokant Tujeam vismitanchi vollokh asa konnak? Norkant konnak asa Tujea promannikponnacho ugddas?
13. Hanv tori Tuka ulo martam, sokallchem mhojem magnnem Tujê mukhar choddta:
14. Kiteak mhonn Tunvem mhaka sôddlai? Kiteak Tujem mukhamoll mhaka lipoitai?
15. Mhojê tornnê piraier thaun hanv dolldiro, mornnachê tonnir pavloleam sarko. Tuji khast hanvem sôsli, boll mhojem virun gelem
16. Tuzo khôr rag mhojea mathear boslo, Tujeam bhirankull dogdogamnim mhozo zalo bhông.
17. Buddtê-udka vori dis-bhôr mhaka veddho ghaltat, sobhonvtim mhojea angar poddtat.
18. Ixttank ani xezariank mhojê sorxile pois kaddleai, kalloka xivai konnacho mhaka sangat nam!
