1. Patkiachea kallzant patkia kodde patokuch uloita; tachea dolleam mukhar Devachi bhirant mhollear nanch!
2. Aplea monant to itlo ful’la ki aplo guneanv taka dixtti poddona, guneanvacho kanttalo-i taka na.
3. Tanchea tonddant fokot vikottai ani baskollponn; zannvai mhollear nanch, boreô kornniô-i nant!
4. Bajer add poddlolo astana porian tachea monant ghollta vik; tachi chaluch khottea margar poddlea, vaittak to lobhdun bosla.
5. Tujem bholeponn, Sorvespora, mollba itlem unch, Tujem visvaxiponn kupam porian pavta.
6. Unch-unch porvotam sarkem Tujem promannikponn, somdira vori khol Tuje nivadde. Mon’xank toxench mon’zatink, Sorvespora, Tum rakhun samballtai.
7. Kitlo omolik, Deva, môg Tuzo! Dekhun mon’xanchim bhurgim Tujea pakhotteam khal asôr gheunk ietat.
8. Tujea ghorantlea subham’ponnan tim sogllim dhadoxi zatat. Tujê goddsannichê ghosgoxit zhorintlem Tum tankam pieunk ditai.
9. Kiteak Tujê sovem asa jivitachi zhôr, ani Tujeach uzvaddan ami uzvadd dekhtanv.
10. Tuka vollkhunk pavleant tankam Tuzo môg sodam dakhoi; Promannik kallzachea mon’xank Promannikponnan vagoi.
11. Gorvixtt mon’xamnim mhaka pãiamnim mostunk dium naka, ani noxtteamnim mhaka hatamnim dhôrun bhair ghalunk nirmum naka.
12. He polle patki monis xevtton poddle! Te sarke sopatt poddlole asat, anink kodinch utthche nant!
