1. Mhojea Deva, mhojea Deva, kiteak Tunvem mhaka sanddlai? Hanv apoit asam, punn Tum pois-pois ravlai; mhojea vollvolleamnim bob martam, tori Tum kan dinaim!
2. Dis-bhôr, Deva mhojea, ulo martam, punn Tum mhaka zap dinaim! Rat-bhôr ulo martam, mhaka tharuch na!
3. Tori, Deva, Tum bhov povitr ani Israel Tuji vakhann’nni korit asa: tench tujem xinvason.
4. Tujer amchea purvozamnim aplo visvas dovorlo, ani visvas dovorlo mhonnun Tunvem tankam suttka dilii.
5. Tuka ulo marlo tedna Tunvem tankam soddoilei; Tujer tãnnim visvas dovorlo ani kodinch te fottovle nant.
6. Punn hanv polle monis nhoi, hanv zalam xennantlo kiddo, loka modem lojek poddlolo, mon’xanchea kenddnniancho mhal!
7. Mhaka polletat titlim-i mhojeô moskoriô kortat, mhojim khebaddam kortat, mhaka kenddun tokli haloitat.
8. Sorvesporacher patieun aslo, tôr Sorvesporan taka nivarcho! Sorvespor tacho ixtt zalear, Tannench taka soddouncho!
9. Hôi, Tunvench mhaka kusveantlo bhair kaddloi, Tunvench mhaka mhojea avoichea horddeak lailoi.
10. Zolma thaun polle Tujêch svadhin hanv aslom, mhojê avoichea kusveant-thaun Tunch mhozo Dev!
11. Mhojer akant aila: pois-pois ravum naka, mhaka tenko adar ditolo konnuch na!
12. Kitlech boil mhaka sorbhonvtim chenchtat, Bashananche darunn boil mhaka veddho ghaltat.
13. Zhompoi martolea, davlam martolea, dhenkor ghaltolea xinva vori mhaka girasunk aplem tondd ugôddtat.
14. Sukunk pavlolê zhori sarko virun veta jiv mhozo, suttun geleant sogllim mhojim haddam. Mhojem kalliz menna vori mhojea horddeant koddon gelem.
15. Kumbarachê bhazlolê matiê bhaxen (15b)mhozo gollo sukun gelo,(15c)jib mhollear talliek chikttolea.
16. Kitlim-xim sunnim mhojê bhonvtonnim! Nixttur mon’xanchem penddem mhaka dhadd ghalta, mhojê hat ani pãi te vidhtat (15d)ani mornnachê tonnir mhaka pavoitat.
17. Sogllim mhojim haddam mhaka mezunk melltat, ho lôk mhaka dolle laun polleta ani khuxi zaun nachta.
18. Mhojim angavlim apnnam bhitôr vantt’tat, ani mhojem anglem konnak poddchem tacher faso uddoitat.
19. Tum tori, Sorvespora, mhaka eklo sanddum naka! Tum mhojem Boll, begobêg mhaka pav!
20. Ubarloli torsad mhojêveli pois kadd ani mhozo babddo jiv hea sunneanchea chopkeantlo vattai.
21. Xinvachea tonddantlo mhaka soddoi. Boil mhaka xingamnim hannkunk ietat: mhaka dolldireak nivar.
22. Mhojea bhavam-bhoinnim modem Tujem Nanv porgôtt kortolom, tachi zomat bhòrta tedna sobhêmazar Tuka vakhanntolom.
23. Sorvesporachi bhokti kortoleamnô, Tachi stuti korat! Jakobachea somest bhurgeamnô, Taka man diat! Israelachea bhurgeamnô, Tachem vondon korat!
24. Kiteak Tannem dublleachê durbollkaiechi kodinch beporva keli na, kenddni keli na, taka Aplem tondd dhamplem na; punn dubllean Taka ulo marlo tedna, taka zap dili.
25. Vhoddlê Sobhent Tuji hanv stuti kortolom, Tachi bhokti kortoleam mukhar mhojeô angovnnô palltolom.
26. Goribank dhadoxi zai-sôr khaunk-jevunk melltolem. Sorvesporak sôdtat tim Taka vakhanntolim. Tanchim kallzam xantin jieum sodankal!
27. Soglli prithum’ xekan’xek Sorvesporacho ugddas korun Tachê-xim portun ietoli; sogllim raxttram mellun Taka pãiam poddtolim.
28. Kiteak Sorvespor razvôtt choloita, raxttrancher podvi cholovpi ekloch To!
29. Taka pãiam poddtole sonvsarantle soglle vhodd-vhodd monis, matiek pavtolim tim somest Tachê mukhar man bagaitolim.
30. Ani mhozo otmo tachê khatir jietolo, mhojim bhurgim-ballam Tachi chakri kortolim. Fuddleam pinddkank Sorvesporachi khobor porgôtt’tolim,
31. Ozun zolma ieunk-naslolê porjek Tachem boreponn oxim gazoitolim: Hem sogllem kelam Sorvesporan!
