1. Sorvespora, mhojea Deva, hanv Tuka xeronna ietam! Mhojê pattik lagloleanchea hatantlo mhaka vattai, mhaka nivar!
2. Na zalear, xinva bhaxen konn-ui mhaka ôddun vhortolo ani mhojê kuddkean kuddke kortolo: tedna konn mhaka soddoitolo?
3. Sorvespora, mhojea Deva, kedna tori hanvem mhojea hatamnim vaitt kelam zait?
4. vô borem vaittan hanvem farik kelam zait? vô mhaka zobordosti kortoleak hanvem sôddun dila zait?
5. Tôr dusman mhojea angar poddum ani mhaka dhôrun vhorum, mhozo jiv pãiam tolla maddoum, mhojem nanvrup matiek lavum!
6. Utth, Sorvespora, Tuzo krôdh dakhoi! Ragan zolltolea mhojea dusmanank domaun dovor! Zago za, Deva mhojea! Neainit kel’li Tuka zai, tôr neainit kôr!
7. Sogllim raxttram, Sorvespora, Tujê bhonvtim zoma zaum-di: tanchê voir Tujê unch sodrer bos!
8. Sorvespor khoroch raxttrancho Mon’subidar! Kallzan hanv promannik ani niropradi: mhaka favo to nivaddo di, Sorvespora!
9. Tum monancho ani kallzancho tthav ghetai, tôr patkianchea noxtteponnacho nas kôr, ani promannik mon’xak thir korun dovor, Nitivont Deva!
10. Dev mhozo ddhal, To mhoji rakhonn korta, promannik kallzacheank To samballta.
11. Mhozo Dev Nitivont Mon’subidar, rokddoch Tacho rag choddona;
12. punn dukh dhôrun Apnna-xim portun ienant tankam sogllea vellar To bhem dakhoita. Dusman apli torsad pazun dovrum, dhonu tann korun toiar ravum:
13. Apnnem toiar kel’lea hatiaramnim apnnachoch to jiv kaddtolo; tachê bann takach zatole ujeache bhale!
14. Polle taka; tachea monan vikottaiecho gôrb dhôrla, kusddaien tem vaddlem, ghatkeponnak zolm dita.
15. Fôndd kaddun fas manddta, punn manddlolea fasant apunnuch poddtolo!
16. Tachi vikottai toch aplo gilltolo; tachi zobordosti tacheach mathear poddtoli!
17. Tachea promannikponnak lagun hanv Sorvesporak dhin’vastam. Bhov Vortea Devachea Nanvachi hanv stuti kortam.
