1. Kaklutchara Deva, mhoji kaklut kôr! Bhov konnvallea Deva, mhozo guneanv kaddun uddoi!
2. Dhuun dhu mhojea opradhanchem khot, patkachea chiklantlo mhaka nitôll kôr!
3. Mhozo guneanv khoroch hanv vollkhun ghetam sodanch mhojem patok asa mhojê mukhar.
4. Tujer, hôi, Tujeruch hanv chuklam Tujê nodren jem vaitt tench hanvem kelam.
5. Dekhun mhojer formonn martai tedna Tujem formonn nitichem, mhoji zhôddti kortai tedna chuki virêt Tuji zhôddti. Hanv polle patkant zolmolam; avoichea kusveant-thaun hanv patki.
6. Mon’xachea kallzant Tuka zai promannikponn; tôr bhôr Tuji zannvai kallzant mhojea.
7. Tum mhaka nitôll-nirmôll kôr ani hanv saf-xudh zatolom. Tum mhaka dhuun kadd ani hanv hima poros dhovo zatolom.
8. Sontosacho ani anondacho nad mhojea kanar poddum-di; ani Tunvem pudd kel’lim haddam jivall zaun bhurkottum!
9. Mhojea patkam veli Tuji nodor kadd, soglle mhoje guneanv nanch kôr!
10. Nirmoll kalliz, Deva, rochun ghal mhojea horddeant. Thir mon ghoddun portun Tum di mhaka.
11. Tujê sorxilo kaddun mhaka bhair ghalum naka, Tuzo povitr atmo mhojê velo kaddum naka.
12. Tujê soddvonnecho portun mhaka sontôs di. Udar monacho korun mhaka thir samball.
13. Tujeô adnia môddtoleank Tuji vatt dakhoitolom, ani patki mon’xam Tujê-xim portun ietolim.
14. Mornnantlo mhaka nivar, Deva, mhojea Taroka, ani Tujea promannikponnachem kirton mhoji jib gazoitoli.
15. Mhoje ontt ugôdd, Sorvespora, ani hanv Tuji vakhann’nni kortolom.
16. Bhettoilolo iôdn atam Tuka man’vona hôm’-ui vopun dilear, to Tuka naka!
17. Devak khoro iôdn mhollear khontibhorit kalliz; khontibhorit ani khaltem zal’lea kallzak kednanch Tum patt korcho naim!
18. Sionak Tuji doiamoia dakhoi, Jerusaleacheô vonnti novean bandun di.
19. Tedna Tuka man’votole Somurti pormannem voplole iodn bhettovnniô ani hom’, vedicher dovorlolea paddkuleanchem somorponn.
