1. Deva, mhaka pav ! Hunvaracho lôtt mhojea golleak porian pavla !
2. Khôl khôl chiklant hanv romblam: pãi dovrunk svat na: Somdirachea udkant poddlam: Iharam pondak hanv buddtam!
3. Arddun arddun khorôs ailea, tallo mhozo sukun gelo, mhojea Devachi vatt polleun dolle gele suzun.
4. Karonn nastana mhozo dvês dhôrtat te zaleat mhojea matheavelea kensam poros chodd. Bexttech mhojea angar poddtat tankam addaunk mhoji babddeachi sokôt pavona. Tumchem hanvem kaddun vhorunk na tem koxem babamnô tumkam porot diunchem ?
5. Mhojea pixeponnan hanvem kel’leô chuki Tum vollkhotai, Deva
6. Dolbharanchea Sorvespora, Tujer visvas tthevtoleank mhaka lagun lojek poddunk dium naka ! Israelachea Deva, Tuka sôdtat tãnnim mhaka lagun visvas sôddunk dium naka!
7. Tujech khatir hanv khebaddam sôstam, Tujêch pasot loz bhôgtam, Deva !
8. Dekhunuch Zalam hanv mhojeam bhavam-bhoinnim modem porko, mhojê khaxa avoichea bhurgeank zalam pordexi,
9. Tujea Ghoracho man rakhchê axen Ihasta mhojem kalliz ! Tuka kenddtat tancheô kenddnniô mhojer poddtat!
10. Upas korun jivak dukh diin zalear, tem-vui mhojea tonddar martat
11. Khontin prachitachem anglem ghalin zalear, moskoriô korun mhaka hanstat.
12. Xarachea darvonttea lagim bosun mhojeô gozali kortat, sorean lal zaun mhojê vixim kortat ovgitam.
13. Veginch mhaka proson’n za mhonn Tujê lagim prarthun magtam, Sorvespora ! Tujea vhodda mogan mhaka aik, Deva, Tum khorea utracho dekhun pav mhaka!
14. Chiklant rombloleak hat dien ubar, mhojea dusmananchea hatantlo mhaka vattai, doriachea lottantlo mhaka nivar !
15. Lharamnim mhaka ôddun vhorunk sôddum naka, somdiran mhaka girasunk dium naka, Patallan mhaka gillunk nirmum naka.
16. Tum, Sorvespora, mogall ani doiall kallzacho: tôr mhaka zap di, mhojer ghal Tuji konnvallaiechi nodor.
17. Tujea chakrak Tujem mukhamoll lipoum naka. Hanv akantak sampoddlam: begibêg mhaka zap di !
18. Ie, lagim sor, mhaka nivar ! dusman mhaka chêptat: tanchea hatantlo mhaka sôddoi !
19. (a)Kosleô kenddnniô hanv sôstam, tem Tum zannai,19(b) bhonglem mhojem prokrut. 19(c)mhaka piddapidd ditat tankam soglleank Tum vollkhotai
20. (a)Khebaddamnim futtlem mhojem kalliz.20(b). Mhoji konn tori doia korit mhonn ravtalom punn konnuch na zalo !20(c)Konn tori mhaka buzvonn diit kai mhonn polletalom punn konnuch na mell’llo !
21. Urfattim, khaunk tãnnim mhaka vik dilem ani mhojê tanek mhaka pieunk dilo xirko !
22. Tanchem jevonn tankam fas zaum, ponktik bosloleanchem on’npivonn tancho ghat gheum!
23. Futtun vochum tanche dolle, tanchim penkttam-zangddam foddfoddum!
24. Tuzo rag tancher pettoi, Tujea krodhan tancho bhosm kôr.
25. Tanchea ganvachem zaum nisontton, tanchea ghoramnim ravunk konnuch urona-so kôr
26. Kiteak Tunvem mar ghal’leak te voilean piddapidd ditat, Tunvem zokom’ kel’leak te odik ghai kortat.
27. Guneanvancher guneanvanchi ras tanchea mathear ghal, Tujê nodrek tankam kodinch promannik korum naka.
28. Jivitachea Gronthantlim tanchim nanvam chirun uddoi, bhagevontanchê vollerint tanchim nanvam dovrich naka.
29. Hanv, Deva ghaiel’lo dolldiro: mhoji soddvonn kôr mhaka ubar!
30. Gaion korun Devachem Nanv voir kaddtolom, dhin’vasnnechea gitamnim Taka vakhanntolom
31. Boilanchea homa poros, xingam-ghetam aslolea paddkuleam poros, hem mhojem dan Sorvesporak odik man’tolem
32. Hem polleun, kaltim mon’xam sontostolim Devak sodtoleanchim kallzam anondan jietolim
33. Kiteak Sorvespor aikota durbollanchim magnnim, sankllimnim aslolea Aplea chakrank To visorna.
34. Sôrg ani sonvsar Taka vakhannum, tosoch doria ani tantum firtat teô sorv rochnna !
35. Kiteak Dev Sionachem taronn kortolo ani Judachim xaram novean bandun kaddtolo: tim aplim korun lôk thoim ravtolo
36. Tachea chakranchea bhurgeanchem daiz tem, jim konn Tacho môg kortat tankam thoim tthikann melltolem.
