1. Mhojem magnnem aik, Sorvespora, mhaka zap di, hanv polle gorib ani dolldiro.
2. Hanv Tuzo bhokt, tôr mhozo jiv samball, Tuzo sevôk Tujer patieun ravta, tôr taka nivar.
3. Tunch mhozo Dev: mhoji doia kôr, Saiba! Dis-bhôr Tukach ulo martam;
4. Tujea chakrachem kalliz sontoxi kôr; Tukach, Saiba, mhozo otmo ubartam.
5. Tum, Saiba, dulôb ani konnvallo, Tuka ulo martoleam thăi Tum maiêmogan bhôrlolo,
6. Mhojem magnnem aikun ghe, Sorvespora, mhojê vinovnnek kan di.
7. Mhojea akantant hanv tuka ulo martam, ani Tum mhaka zap ditai.
8. Tujê sarko dusro dêv nanch, Saiba, Tujim kortutvam sôr-naxil’lim
9. Sogllim raxttram Tuka pornnipat korunk ietolim, ani Tujem Nanv vakhanntolim Dhonia,
10. kiteak Tum ekloch xrêxtt, Tujim kortutvam ojapanchim tujê bhair anink dêv nam.
11. Tuka visvaxi ravunk tunch mhaka vatt dakhoi, Sorvespora. Sogllea kallzan Tuji bhokti korunk Tunch mhaka xikoi.
12. Pormespora, mhojea Deva, sogllea mhojea kallzan Tuka dhin’vastam sodankal Tujeam Nanv vakhanntam,
13. Kiteak mhojê thãi Tuvem vhôdd môg dakhoiloi, khôl khonddantlo Tunvem mhaka nivarloi.
14. Gorvi monis mhojer uprasleat, Deva, kitle nixttur monis mhozo jiv kaddunk sôdtat, Tuji te porva korich nant.
15. Punn Tum, Saiba, doiall ani kakluticho Dev, Tuzo rag rokddoch choddonam, Tum maiêmogan bhorlolo ani bhov visvaxi,
16. Tôr mhaka polle, mhoji doia kôr. Hanv Tuzo chakôr mhaka Tujem boll di; Tujê chakornnicho put hanv: mhaka nivar.
17. Ekuch mhaka khunna di Tujea bholeponnachi. Mhojeam dusmanank lojek ghal, Sorvespora, Tum mhozo Adar ani mhoji Buzvonn mhonn tankam dakhoi.
