1. Bhoktivont mon’xank Dev kitlo mhonn boro! Nirmoll kallzacheank Pormespor kitlo bholo!
2. Mhoje pãi halonk pavlole, mhojim panvlam nisortat mhonn distalim,
3. kiteak vaitt kortoleanchem sukh sompôt polleun, team gorvixttanchi mhaka kurnnattkai disli.
4. Koxtt vollvolle mhonnlole tankam nant, datte-motte zaleat, polleiat kitle puxtt-gulgulit !
5. Ieram mon’xam porim khont dukh mhonn tankam nanch! mon’xagotiche tankam hal-upodre nant!
6. Dekhun gorv tanchi golleantli sorpolli ani zulum’ tanchem angvostr.
7. Chorbel’lea tanchea kallzantli gollta vikottai, tanchea monant upzotat fokot naddbudhi.
8. Khebddam kortat, kusddaien uloitat, tanchem gorvi chintop ulovop sogllem zulumachench.
9. Dev nanch zal’lê porim aple nirnnoi sonvsaracher thaptat, ani jiben prithumecher podvi choloitat.
10. Dekhun lôk tanchê pattlean veta ani tanchim utram ham korun sotman’ta.
11. Tanchi mhonn’nni oxi: “Devak koxem kolltolem? Sorvespor mhonntat to Dev kitem zanna rê?"
12. Polleiat rê tankam, noxtte monis oslech! Kosloch tankam husko nam, grestkai tanchi choddot choddot asa.
13. Toxem tôr, nirmoll kalliz gheun boslear kiteak upkarta? Nennttuvaien hat dhulear kitem faido ?
14. Kiteak mhollear dis-bhôr mhojer dogdog ietatuch ani disachea disa mhojer khast poddta.
15. “Tanchê bhaxen hanv-ui uloitolom”: oxem hanvem mhonnlolem zalear, Tujeam visvaxi bhurgeancho hanv ghat ghetolom aslom.
16. Hea proxnnacho ôrth sodun khub hanvem niall kelo, punn ekdom’ ovghôdd to mhaka laglo.
17. Punn akhrek Devacheam guttancho mhaka ôrth mell’lo, ani papiancho xevôtt hanv ollkhunk pavlom:
18. Sot tem hem: nisortê denvnner Tum tankam ghaltai ani ticher tankam lottun tanchem ghorttann korun sôddtai.
19. Kitlo goddgoddit tancho bhosm zata! Tancho zata vinas, kolkolun te poddtat.
20. Sopnantlo utthta tachê vori, Tum zago zatai tednam, Pormespora, savlliô zal’lê porim tanchi Tum porva korinãi.
21. Jednam mhojem kalliz koddu zatalem ani mon mhojem khontin bhôrtalem.
22. Tednam hanv murkh zal’lom, mhoji môt pixi zal’li, mon’zat koso zal’lom Tujê mukhar
23. Tori astanam Tujê mukharuch ravlom, ani Tunvem mhozo uzvo hat ghôtt dhôrloi;
24. atam Tuji budh diun mhaka vatt dakhoi, ani Tujea voibhovant mhaka pavoi.
25. Sorgar mhaka konn asa bogor Tum? Ani mhojea sangata Tum asai zalear, sonvsarant mhaka anink kãich naka.
26. Mhojem ang ani mhojem kalliz mogan virtat. Tum mhojea kallzacho Dev, mhojem Daiz sasnnachea sasnnak !
27. Tuka soddun vetoleancho khoroch zatolo vinas, ovisvaxiponnamTuka sanddun vetat tancho Tum bhosm kortoloi
28. Punn hanv mugelo Deva sorxim dhadoxi asa, Pormesporachea gopant hanvem asro sodun kaddla. Sionacheam darvontteam mukhar soglleam Tujeam kortutvanchem hanv kirton gaitolom.
