1. Ontrall Devachi mhoima vornnita, mollob Tachea hatanchem kam’ porgôtt’ta!
2. Êk dis dusrea disak hi gozal sangit asa, êk rat dusrê ratik hi khobor kolloit asa:
3. Ulovop na, utor mhollear nanch, talleacho avaz aikunkuch iena!
4. Tori xekan’xek prithumecher tancho tallo gazta, sonvsarachea ximam porian tancho sondêx pavta! Thoim Tannem suriak êk tombu ghalun dovorla.
5. Novro koso aplea logna-kuddantlo to bhair sorun ieta, vira sarko khuxalkaien apli dhanv marunk lagta.
6. Mollbachê ekê ximer to udeta, mollbachê nimannê ximer porian to dhanvun pavta, ani tachea unallantlem kitench vattavona!
7. Sorvesporachi somurt sorvbori: jivitachi ghottai! Sorvesporache nem’ sodanch khore: Nennteachi zannvai!
8. Sorvesporacheô adnia niticheô: kallzacho sontôs! Sorvesporacho hukum’ spôxtt uzôll: Dolleancho uzvadd!
9. Sorvesporachi bhokti bhov povitr: sodam togpachi! Sorvesporache nirnnoi sotache: Soglle nitiche!
10. Bhang’ra poros, nirbhel bhangara-von kallzak tanchi as! Mhonva poros, pollientlea mhonva-von Odik te goddve!
11. Dekhun tantlean Tujea sevokak mellta zannvai, ani tankam pallo diun to vhodd inam’ zôddta.
12. Punn aplea sogllea chukinchi konnak vollokh asot? Nennarponnim kel’leô mhojeô chuki mhaka bhogôs.
13. Ani Tujea sevokak gorvi zaunk dium naka, gorvak mhojer odhikar cholounk nirmum naka. Tedna hanv guneanvavinn choltolom, vhodda patkantlo mekllo zatolom.
14. Mhojea tonddantlim utram, mhojea kallzachim chintnam Tuka manom, Sorvespora, mhojea Khoddpa, mhojea Taroka!
