1. Noxttea mon’xam pasot challvom naka, kusddeponnam kortoleanchi nattkai dhôrum naka.
2. Kordda porim sottkorn te suktat, pachvea tonna vori bavun vetat.
3. Sorvesporacher patieun rav ani borem tem kôr: Dês bhogunk ani xantin jieunk tuka melltolem.
4. Sorvespora sovem asum sogllo tuzo sontôs: tujem kalliz axeta titlem-i To tuka ditolo.
5. Tujem jivit Sorvesporachea hatant ghal; Tacher visvas dovor: goroz tem To kortolo.
6. Tujem boreponn uzvaddtea disa porim udetolem, tujem promannikponn don'parchea vota vori porzolltolem.
7. (a)Sorvespora mukhar thôndd-xant rav ani Tacher visvas dovor. Dusro konn sukhant ufeta mhonn husko dhôrum naka. (7b)naddbudh iievjitat tanchi porva korum naka.
8. Krodhan rogot xizunk dium naka: tuzo rag denvoi. Uchambôll zaum naka: zaxi zalear fokot vaitt korunk pavtoloi.
9. Kiteak noxttea mon’xancho nas zaun vetolo, punn Sorvesporacher visvas dovortat tankam Desache daiji zaunk melltolem.
10. Matso rav noxtte monis nanch zatole; pollexi zalear, atanch hanga aslo to khoim pavlo?!
11. Punn Dês zatolo khaltea mon’xancho ani sogllêch vatten tankam xantin jieunk melltolem.
12. Khotto-noxtto monis niropradiak fas manddunk ievjit asa, tacher dant kirlunuch asa;
13. Punn tachê dis pavle mhonn vollkhun Sorvespor oslea mon’xak hansta.
14. (a)Noxtte monis torvar hatant gheunuch asat, tãnnim dhonu tann korun dovorla: (14c)Dublleank ani Lhan’vikank ghuspaunk (b)promannik mon’xacho jiv kaddunk sôdtat.
15. Punn tanchi torvar tancheach hodd’ddeant rombtoli, tanche dhonu moddon kuddke zatole.
16. Promannik mon’xak chodd kãi na zait, punn noxtteanchê sogllê girestkaiê poros tench borem.
17. Kiteak noxtteanchem boll khorench moddon vetolem, punn promannik mon’xank Sorvespor samballtolo.
18. Borea mon’xancho jiv Sorvespor rakhta, tankam sasnnachem daiz favo zatolem;
19. sonkoxttachea vellar tim ghaborchim nant, dukollachea disa tankam jevonn unnem zaunchem na.
20. Punn noxttea mon’xancho bhosm zatolo: Sorvesporache dusman te; xetantlim sobit fulam koxim te bavtole, dhunvra vori ubun vetole.
21. Noxtto monis uxnnem gheta punn ghetlolem portun dina:promannik monis udar kallzan vanttun dita.
22. Zankam Dev axirvad dita tankam Dês bhôgunk melltolo, zancher To xirap ghalta tancho bhosm zatolo.
23. Mon’xachim panvlam Sorvespor rakhta ani mogan tachê vattêveleô soglleô addkholli kaddun uddoita.
24. Nisorlear-ui to sokla poddcho na, kiteak Sorvespor tachea hatak ghôtt dhôrta.
25. Tornno aslom, atam zalam mhataro, punn borea mon’xak Devan sanddlolo hanvem kodinch polleunk na. Tachea bhurgeank bhik magunk poddlolem aiz porian hanvem polleunk na.
26. Vèll ani kall pollenastana, to doia korta ani uxnnem dita: tachi sonsôt subhagi zatoli.
27. Vaittak patt kôr, borea kornniank lag; sasnnak togta toslem tuka tthikann melltolem,
28. Kiteak borem tem Sorvesporak man’ta ani Aplea bhoktank To kodinch sanddcho na. Noxttim mon’xam sasnnak nanch zatolim, tanchê sonsticho nas zaun vetolo.
29. Dês zatolo borea mon’xanchem daiz: thoim tim tthikann kortolim sasnnachea sasnnak!
30. Bhoktachea onttantli vhanvta zannvai, tache jiber asant tim utram sarkim.
31. Tachea kallzant riglea aplea Devachi Somurt, choltana tacho pãi kodinch nisorna.
32. Noxtto monis borea mon’xachê vatter doddeak ravta, koso tacho jiv kaddcho tem monant gholloita.
33. Punn Sorvespor taka tachea tabeant sôddcho na ani zhôddtechea vellar tachea mathear khastichem formonn poddunk diuncho na.
34. (a)Sorvesporacher patieun rav, Tachea margan chol, (34b)Toch tuka unch kaddun Dês bhogunk ditolo, ani noxtteancho Apunn koso bhosm korta to tuka dakhoitolo.
35. Gorvan ful’lolea noxttea mon’xak hanvem dekhlo: unch khandeancho, Lebanacho matlolo devdhar distalo.
36. Têch vatten portun gelom tedna, khoim tôr gelo ho? Hevxin-tevxin sôdlo, khoinsoruch na mell’lo!
37. Promannik mon’xacher nodor ghal, borea kallzachea mon’xak barkaien polle: xant mon’xak bhurgeam-ballanchem bhag!
38. Punn papiancho sarko bhosm zatolo, noxtteanchê sonsticho zatolo vinas!
39. Borea mon’xanchi soddvonn Sorvesporachea hatant asa; akantachea vellar To tancho alaxiro.
40. (a)Sorvespor tankam adar dita ani soddoita, Apnnak xeronna ietat mhonn To tankam nivarta. (40b)ani To tuka noxtteanchea chopkentlo nivartolo.
