1. Deva, mhojea Raza, hanv Tuji vhoddvik gaitam, sodankal Tujem Nanv vakhanntam!
2. Disan’dis Tuka dhin’vastam ani thambonastana Tujea Nanvachi stuti kortam!
3. Sorvespor kitlo thôr ani vondivont! Tachê thoraiecho tthav gheum nozo!
4. Pinddka pinddkek Tujim kortutvam porgôtt korta; Tujea bollixtt kornnianchi khobor gazoit veta.
5. Tuji kirti kitli gazta! Tuji mhoima kitli fankta! Tujea ochorianchi khobor soglleank porgôtt zalea!
6. Monis vornnitole Tujê podvecheô bhirankull kornniô, ani Tujê vhoddvikecho prochar kortole.
7. Tujea ogonnit boreponnacho ugddas kortole, ani Tujem promannikponn vakhanntole.
8. Sorvespor kitlo konnvallo ani maiêmogacho! Tacho rag sott-kornn choddta toslo nhoi: To ekdom’ mogall!
9. Somestank Sorvespor kitlo boro! Sogllea Aplea rochnnank Kitlo maiêmogacho!
10. Tunvem rochlãi tem sogllem Tuka dhin’vasum, Sorvespora! Tuje bhokt Tujem vondon korum,
11. Tujê razvôttechi mhoima gazoum ani Tuji podvi porgôtt korum!
12. Oxem sogllea mon’xank Tujim vortim kortutvam ani Tujê razvottechi loklokit mhoima kollit zaum.
13. Tujem raj mhollear sasnnachem raj, pinddkechê pinddkek Tuji razpodvi togta. Dil’lea utrak Sorvespor sodanch visvaxi, soglleô Tacheô kornniô mogacheô.
14. Sokla poddtoleank Sorvespor hat dita, zuluman cheploleank To nitt ubim korta.
15. Somestanche dolle visvasan Tujeruch lailole asat, soglleank Tum favo tea vellar posonn ditai.
16. Tuzo soddôll hat ugddun vantt’tai ani sogllea rochnnank dhadoxi kortai.
17. Sorvesporacheô vattô soglleôch promannikponnacheô, ani soglleô Tacheô kornniô mogacheô.
18. Apnnak ulo martolea somestank, khorea monan ulo martat tankam, Sorvespor sodam laginch asa.
19. Aplea bhoktanchi khuxi To korta, tanchi bob aikota ani tankam nivarta.
20. Aplea ixttank Sorvespor rakhun gheta, punn sogllea noxtteancho To bhosm korta.
21. Mhojea tonddant sodam asum Sorvesporachi vakhann’nni, ani Tachea Povitr Nanvachi soglleô rochnna stuti korum sasnna-sasnnak!
