1. Tuka, Sorvespora, ulo martam. Tum mhojem Khoddop! Mhaka kan di. Tum zôr mhaka chit dinaim, fonddant denvloleam porim zatolom.
2. Ho polle hanv Tuka prarthitam; Tujea Povitr Mondirak polleun, hat zôddun magnnem kortam: tôr mhojê vinonticho avaz aikun ghe.
3. Noxttea mon’xanchea vangdda, khottea mon’xam borabor, mhaka lottun uddoum naka. Tanchea tonddantlim golltat xantichim utram, punn kallzan bhòrlam vik!
4. Tanchea kortubam pormannem, tanchea kornnianchê vikottaiê pormannem tankam farik kôr. Tanchea hatanchea kamam pormannem tankam mozuri di, Sorvespora; favo tea mapan tankam mezun di.
5. Sorvesporachea kortutvanchi te porva korinant, Tachea hatancheô kornniô te vollkhonant. Hea pasot To tancho nas korum, ani portun tankam tokli voir kaddunk na dium!
6. Mhojea uleak, mhojê vinontik kan dilo dekhun Sorvesporak zoi zoi!
7. Sorvespor mhojem Boll ani Ddhal, Tacher mhojea kallzan visvas dovorlo: Tannem mhaka adar dilo; ani mhojea angant novo jiv bhoron ailo. Dekhun sogllea kallzan taka dhin’vastam.
8. Sorvespor Aplê porjechem boll, Tannem makhloleank taronnacho kil’lo To.
9. Tujê porjek taronn di. Tujea daizak sukhest kôr. Tancho Gonvlli za, sodankal tankam uklun vhor!
