1. Axeun axeun Sorvesporachi vatt polletalom: Tannem mhojer voddov ghalo, Mhojea uleak kan dilo.
2. Bhirankull khonddantlo Tannem mhaka bhair kaddlo; chiklantlo, xennantlo Tannem mhaka ubarlo. khoddpar Tannem mhaka ghôtt ubo kelo. mhoje pãi halonam-xe thir kele.
3. Ek novem git Tannem mhojea tonddant ghalam; amchea Devachem kirton. Hem polleun zaito lôk kamptolo, Sorvesporacher visvas dovortolo.
4. Zo monis Sorvesporacher visvas tthevta, ani kuddea devank bhôztolea fituram borabor bhonvona, to khorench bhagi!
5. Kitlim Tujim vismitam, Sorvespora, mhojea Deva! Jem sogllem amchê khatir ievjilãi, tachem map-mezop na! Tujê sarko dusro konn? Tujim sogllim kortutvam hanv vornnin zalear, tim ucharum-nozo titlim!
6. Iodn ani bhettovnniô Tuka naka zalim, punn Tujea utrak mhojê kan ukte kelei. Hom’ ani boliô Tunvem magunk naim.
7. (a)Tedna hanvem mhollem: "Ho polle hanv ietam!" (7b)Xastrachea Gronthacher mhaka formailolem asa.
8. (a)Tujê khuxek hanvem pallo diuncho mhonn (8b)Deva mhojea, sogllea mhojea kallzan Tujê Somurticho hanv môg kortam!
9. Sodanch Tujem promannikponn Vhoddlê Sobhent hanvem porgôtt kelam. Mhojem tondd hanv dhampun dovorcho na: hem Tum borem zannoi, Sorvespora.
10. Tujem promannikponn mhojea kallzant hanvem gupit dovrunk na, punn Tujea visvaxiponnacho ani soddvonnecho hanvem prochar kela. Vhoddli Sobha zomta tedna Tuzo môg ani visvaxiponn hanvem lipounk na.
11. Tuji konnvallai, Sorvespora, mhaka dakhoinastana ravum naka;Tuzo maiêmog ani visvaxiponn sodankal mhaka ballgun dovrum!
12. Vignam mhaka veddho ghaltat: tankam lêkhuch na! Mhojea guneanvamnim mhaka dhôrla: mhaka kãich disona! Te zaleat mhojea matheavelea kensam poros chodd: kalliz mhojem virgholam!
13. Doia korun mhaka nivar, Sorvespora! Sorvespora, begobêg mhaka pav!
14. Mhozo jiv kaddunk sôdtat tim gondhollak sampddum, lojek poddum! Mhojem nirbhag polleun khuxi zatat tankam dhanvddai! Tancho nas zaum!
15. Mhojeô moskoriô kortat tim thottakun lojek sampddum!
16. Tuji vatt polleun asat tankam soglleank Tujê sovem mellum anond ani sontôs! Tujea taronnak ravtat tim sogllim oxem sodanch mhonnunk pavum: "Kitlo vorto amcho Dev!"
17. Hanv gorib ani dolldiro, punn Sorvespor korta mhozo husko: Tum mhozo Askari, mhozo Tarôk, mhozo Dev; vegim vegim ie, kallav korum naka!
