1. Sorvespora, hanv Tuka xeronan ietam: mhaka kodinch lojek ghalum naka. Tum promannik dekhun mhaka nivar.
2. Mhojê vinovnnek kan di, begobêg mhaka sôddounk ie! Tum mhojem Khoddop: Tujer mhaka thar di; Tum mhozo Kil’lo: Tujê bhitôr mhaka asro di.
3. Khorench Tum mhojem Khoddop, khorench Tum mhozo Kil’lo! Tujea Nanva khatir mhaka choloi, mhaka vatt dakhoi.
4. Choriam manddlolea zallant mhaka poddunk dium naka: Tum ekloch mhozo adar!
5. Tujea hatant ghaltam mhozo otmo, Tujê bhair mhaka soddvonn na, Sorvespora, visvaxi Deva!
6. Kud'dea polkea devank bhôztoleanchi Tuka vitt dista. Punn hanv Sorvesporacher visvas dovortam:
7. Tujea moga khatir hanv anondan bhòrtolom ani murgott’tolom. Mhojem nirbhag Tunvem pollelãi, mhojea otmeachea tollmolleancher Tunvem nodor marleai.
8. Mhojea dusmanachea hatant Tunvem mhaka sôddunk naim, punn lamb-rund vatten mhaka cholunk nirmilãi.
9. Mhojer akant aila, Sorvespora: mhoji doia kôr: Roddun-roddun suzleat mhojê dolle, khontint buddlam mhojem kalliz,
10. Dukhin vollvollta jiv mhozo, haskar-suskar sôddun virghun veta mhojem auk. Koxttanchea bharan virlem mhojem boll ani haddam legun gelim sukun.
11. Dusman soglle kortat mhozo tiroskar, xezareank zalam kenddnniancho mhal, mhaka polleun mhojea vollkhicheank bhirant dista! Vatter mhoji savlli dixtti poddona fuddem Sogllim kus martat.
12. Zoxim mel’leank visortat, toso mhaka monantlo bhair ghalo, koila-kuddkeam bhaxen mhaka konnxeak uddoilo!
13. Mhojer gunngunntat tem mhojea kanar poddta, sorbhonvtim bhiranticho kolkolo! Sogllim borabor mhojer challovtat, mhozo jiv kaddunk manddnniô ievjitat.
14. Punn hanv, Sorvespora, Tujer patieun asam. Tunch mhozo Dev! hoch mhojea kallzacho ul’las.
15. Tujeach hatant asa mhojem jivit, mhaka piddapidd ditolea dusmananchea hatantlo mhaka nivar!
16. Tujem dorxon mhaka diun Tujea chakrak sontosbhorit kôr. Tujea maiêmogan mhaka soddoi!
17. Tuka ulo martam, Sorvespora: mhaka lojek ghalum naka. Noxtte lojek sampddum, Tankanch oge korun Norkant dhoklun uddoi.
18. Mosten borea mon’xancher add uloitat, gorvan bhoron tanchi beporva kortat, tanchech fottkire ontt mone zaum!
19. Tuji bhokti kortoleank Tunvem nirmil’lem, Tuka xeronna ietoleank Tunvem favo kel’lem, kedem vhoddlem Tujem bholeponn, Sorvespora,sogllea mon’xanchea dolleam mukhar!
20. Monis lochanddam manddtat tedna Tujea gopant tankam lipoun asro ditai; jibô vad-vivad kortat tedna Tujea tombunt tankam rakhun dovortai.
21. Ghott durganchea xarant Tannem Aplea mogachim vismitam mhojê khatir korun dakhoilim: dekhun hanv Sorvesporak vakhanntam!
22. Akantachea vellar hanvem mhollem: "Hanv sarkoch Tujê nodrê bhair poddlom!" Punn adar magun Tuka ulo martananch mhoji vinonti Tunvem aikun ghetlii.
23. Tumi sogllim Devachi bhokti kortoleamnô, Sorvesporacho môg korat! Aplea visvaxi bhoktank To rakhta, punn gorvan bhòrloleank Sorvespor kotthinaien kortolo.
24. Sorvesporacher visvas tthevtoleamnô, tumchem kalliz ghott dhôrat!
