1. Sorvesporak vakhannat, Tachem Nanv porgott korat, porzam modem Tachim kortutvam gazoiat.
2. Taka tumi gitam gaiat, kin’noriancher Tachi stuti korat, Tacheam ochorianchi sogllê kodden kirti gaiat.
3. Tachea Povitr Nanvan obhiman bhôgat, Sorvesporak sôdtat tim kallzam sontosbhorit zaum.
4. Sorvesporacher ani Tachê podvecher tumchem mon dovrat, dis rat Tachem mukhamoll sodit ravat.
5. Tannem kel’leam ochoriam-vismitancho, Tachea tonddantleam nivaddeancho ugddas dhôrat.
6. Tachea chakra Abrahamacheam putam-dhuvamnô, Tannem vinchun kaddlolea Jakobacheam bhurgeamnô,
7. Toch Sorvespor amcho Dev! Xekan’xek prithumecher Tachi podvi cholta.
8. Hozar pinddkant dil’lea utracho, Aplea Koraracho Sorvesporak sodankal ugddas asa
9. Tannem Abrahama kodden koblat kel’li, Izakak soput gheun bhas dil’li, tich ti.
10. Jakobak Tannem ho nirnnoi tharaun dilo, Israelak sasnnak togta toslo Korar sthapun dilo.
11. Tannem mhollem: “Tumchem khaxelem daiz korun tumkam Hanv Kanaan’cho ho dês ditam.”
12. Jednam mezunk gelear tim bhov thoddim aslim, vetat thôi mutt-bhôr porko lôk;
13. Tednam tim eka desant thaun dusrea desant, eka rajeantlim dusrea rajeant, hennem-tennem bhonvtalim.
14. Tednam tankam piddapidd diunk konnakuch Tannem nirmunk nam, tanchea nim’tan Tannem razank xiddkaile.
15. “Hanvem makhloleank tumi hat lavum nakat, Mhojeam provadiank oslench vaitt korum nakat!"
16. Magir Tannem desant dukôll poddunk dilo, tanchem udorposonn kaddun uddoilem
17. Tanchê fuddem eka mon’xak dhaddlo; gulam’koso vikun dil’lo Zuze to.
18. Tache pái sankllinim bandlole, tachê, manicher lokhonddachem zum' bosoil’lem.
19. Xekim tannem parkun sanglolem tench ghoddon ailem: Sorvesporachea utran tachem utor khorem kelem.
20. Tednam razan taka bondkhonnintlo kaddunk lailo, raxttranchea patxaian taka suttka dili,
21. aplea ghorant taka karbhari nemlo, aplê astecher taka odhikar dilo.
22. khuxê pormannem razkunvrank xikovnn diunk ani budhvontank khori zannvai xikounk patxaian taka odhikar dilo.
23. Oso Israel Ejiptant vochunk pavlo, Kham’ desant Jakoban aplem biradd kelem.
24. Apli porza Tannem khub vaddoili, tankam zulum kortoleam poros bollixt tankam kelim.
25. Ejiptkaranchim kallzam darunn korun, tánnim Aplê porjecho dvês dhôri-so kelo ani Apleam sevokancher addkam-naddkam manddi-xim kelim
26. Tednam Aplea chakra Moizesak dhaddlo ani Apnnem vinchun kaddlolea Aaronak.
27. Thoi tánnim Tachim ochoriam korun dakhoilim, Kham’ desant Tachim vismitam porzollailim.
28. Tannem andhar pattoilo ani sogllê kodden kallôk zalo, tori tannim Tachem utor manun ghetlem nam.
29. Nodinchem udok Tannem kelem rogot ani soglli maslli marun uddoili
30. Razacheam kuddam-vosreamnim porian, manddkeam-bebkamnim bhorlo tancho dês.
31. Tachea utrak gorvanche mus poddle ani akhea desant zollarinchim bireancher birim.
32. Udka bodla Tannem dhaddlo korveancho paus, ani zhoglam-vizamnim desacho nas zalo.
33. Dak-velink ani anjirank boroch mar lago-so kelo, akhea desant rukhancho ibadd zaunk dilo.
34. Tachea utrak aile ttoll ani borodd; mezum nozo itli tanchi ras!
35. Chabun chaun xetamnim tonnachi êk axi legun sôddli nam, zomnivelim sogllim follam gillun giraslim.
36. Akhrek desantleam soglleam malgoddeam putank Tannem marun uddoile, tanchê sufollaiecheam soglleam prothom’ follancho nas kelo.
37. Tednam rupea-bhangara soit Israelak Tannem bhair kaddlo, tancheam kullantlo eklo punn pattim urlo nam.
38. Tim bhair sorlim tednam Ejiptkarank sontôs bhôglo, kiteak tancher bhoikôr akant poddlolo.
39. Vistarlolea kupan tankam lipoun tanchi Tannem rakhonn keli, ani ratcho uzvadd diunk uzo pettoilo.
40. Jevonn magtoleank Tannem Lhoveanchem dhaddlem birem ani sorginchea unddean tankam dhadoxi kelim.
41. Tannem khoddop fôddlem ani ghosghoxit vhanvlem udok, oronneantlean nhôi koxi tem vhanvot gelem.
42. Abrahamak, Aplea chakrak, Aplem povitr utor dil’lem tem Tannem monant haddlem,
43. ani sontosan Aplê porjek Tannem bhair kaddli, Apnnem vinchun kaddloleank anondacheam ul’lasam modem Tannem fuddem vhelim.
44. onbhavartianche des Tannem tanchea hatant ghale; dusreancheam koxttanchem foll tannim apnnanchê adhin kelem. Zoi, zoi Sorvespor! Zoi, zoi Sorvespor!
