1. Deva, razak Tujem xhanneponn di, Tujeach Nanvan nit korcho odhikar razachea putachea hatant ghal;
2. oso to neainitin Tujê porjechi mon’subi kortolo ani Tujea durbollank nit korun ditolo.
3. Porvotancher lokak xanti upzum, dongrancher tankam neainit mellum.
4. Nitin to durbollank rakhum ani goribanchea bhurgeank nivarum, ani tankam zobordosti kortoleanchi pudd korum.
5. Suria vori ani chondrima sarko iugam-iugam porian to togtolo.
6. Moidanar paus poddta toso to denvtolo, zomin bhizoitolea pausachea thembeam vori to ietolo.
7. Tachea kallar vostolim promannikponn ani xanti: chondrim’ aso-sôr xekan’xek tim togtolim.
8. Eka doria thaun dusrea doria porian, nhõichê deger thaun prithumechea ximam porian choltoli tachi razvôtt.
9. Tachê mukhar oronneantle dusman dimbi môddtole, tache voiri saxttangim poddtole.
10. Tarxisache ani dipam-zunveanche raza aplo razdôndd gheun tachê-xim ietole. Taka danam-kannikô gheun pavtole Arabieche ani Ethiopieche raza.
11. Tachê mukhar sorpott poddtole soglle raza, tachi seva kortolim sorv raxttram.
12. Ulo martolea goribank, adar-naxil’lea dublleank to pavtolo.
13. Dolldireanchi ani durbollanchi to doia kortolo, goribancho jiv to samballtolo.
14. Zulum’ ani zobordosti sônstoleank to soddoitolo, tancho jiv tachea dolleam mukhar bhov moladik.
15. Lamb auk taka mellum, Arabiechem bhangar lôk taka vopum! Thambonastana tachê khatir magnnim choddtolim, dis-bhôr tacher axirvad magtolim.
16. Porvotanchê tengxê meren subham’ponnan desant piktolo dhanno. Lebanache rukh rosrostat tê porim, zomnicher tonn mat’ta tê bhaxen, desant follanchi pikavôll.
17. Sodankal tachem nanv vhodd zaum ani suria togo-sôr tem tôgum. Prithumechim sogllim kullam taka lagun apunn sudoiv mhonnttolim, sogllim raxttram tachem nanv voir kaddtolim.
18. Sorvespor, Israelacho Dev, thôr zaum: To ekloch korta vismitam!
19. Tachem voibhovi Nanv sodankal vhodd zaum, Tachê mhoimen bhorom ak’kho sonvsar! Amen! Amen!
20. Hanga somptat magnnim Jes’sechea puta Davidachim.
