1. Kiteak mhonn, Sorvespora, itlo pois ravtai? Akantachea vellar kiteak mhonn liptai?
2. Noxtteanchem gorv goribak girasta; dusreamnim ievjil’lê naddbudhik to sampoddta.
3. Apnnak zai aslem toxench zata, oxem chintun noxtto monis boddai dakhoita; apsvarthi monis Sorvesporachi korta ninda ani beporva!
4. "Tacho rag thoim voir cholot; mhaka To khoincho khast laitolo?! Dev anink khõi rê?!" oslinch chintnam Gholltat tachea monant.
5. Vatter addmellim nastana to cholta; Tuji nit asa mhonn tachea monant nanch, aplea dusmanank to kãich nhoi korta.
6. "Mhaka haloitolo konn na! Mhojer nirbhag kodinch ieunchem na!" oxem to chintit asa.
7. Lobaddiô ani zulum’, itleanuch tachem tondd bhòrlam; tachê jibê ponda pidapidd ani kusdeponn.
8. Lovheam modem doddeak ravta, lipchoriam to niropradheank jivexim marta. Niradari khoinchean aplea chopkeant poddtolo, Tem dolleank tel lavun to polleunuch asa.
9. Dholint gopchup ravlolea xinva bhaxen to doddeak ravta; doddeak ravlolo to zhompoi marta; zhompoi marina fuddem taka aplea zallant dhôrun vhorta.
10. Ukoddeam bosun, to uddki marunk aito zala, ani niradari babddo tachea tabeant poddta.
11. "Dev visorlo, Devachem tondd liplam, Devak amchem khõi dista rê?" oxem to aplea monant chint’ta.
12. Atam tori utth, Sorvespora! Tuzo hat ubar, Deva! goribank visrum naka!
13. Kiteak mhonn noxtto monis Devachim khebaddam korta? "To mhaka khast khõicho laitolo!" kallzant tannem oxem kiteak chintchem?
14. Punn khorench koxtt ani dukham Tunvem dekhleãi; Tum tim polletai ani Tujea hatant ghetai. Zulum' bhôgta to aplo jiv Tujea hatant sôddta; Onath bhurgeancho adari Tunch eklo!
15. Khottea noxttea mon’xachem boll môddun uddoi! Tachea noxtteponnak khast lai, tachi savlli legun dovrum naka!
16. Aiz ani sodankal Sorvespor ekloch Raza, Tachê razvoddkentlo onbhavarthi lôk nanch zatolo!
17. Sorvespora, goribanchem magnnem Tujea kanant poddtach, tanchea kallzank Tum dhir ditai, tankam Tum kan ditai:
18. Karonn onathanche ani zulum’ bhôgtoleanche hok’k Tum neainit korun samballtai; oso dhortorêvelo monis aplea peleak anink bhenkddaunk xokcho na.
