1. Otmea mhojea, Sorvesporachi stuti kôr, Sorvespora, mhojea Deva, kitlo Tum vorto, Tezvont ani mhoimen bhórlolo,
2. uzvadd prokas fankoitolo, Mattva bhaxen Tum mollob vistartai,
3. pausacheam udkam voir Tuzo nivas bandtai, kupancho Tuzo rôth kortai, vareacheam pakhotteancher Tum choltai;
4. vare mhollear Tuje dut, ujeache zhogzhokit bann Tuje chakor.
5. Prithum’ Tunvem tichê buniadicher tharaileai, sasnnachea sasnnak ti thir ghôtt keleai,
6. doriachem avoronn tika pangrunk dilêi, udkam tednam porvotam voir choddtalim
7. Tunvem dhenkso ghaloi ani udkam pollun gelim, Tuzo gôddgôdd aikun tannim kus marli.
8. Porvotam voilean choddun dhanvun Tunvem tharailolea zagear tim denvun ailim.
9. Suki zomin novean buddoinam zaunk Tunvem tankam utrum-nozo tosleô ximô tharaileôi.
10. Vollam-falkeamnim Tum zhori futto-xeô kortai, dongram modlean teô vhanvun ietat,
11. soglleam savzank pieunk ditat, ranantlim gaddvam-i thói apli tan bhagoitat.
12. Tanchê degek mollbavelim sovnnim aple ghontter kortat, rukhancheam khandeancher bosun killbilltat.
13. Tujea nivasa thaun dongrancher paus ghaltai, Tujea mollbachea dennean zomin dhadoxi zata.
14. Gorvam posunk Tum pachvem tonn utpon kortai ani mon’xan bhumintlo aplo gras kaddchê khatir tacheam gorzank Tuk zhaddam vaddoitai.
15. mon’xachem kalliz kuxal korta to soro, tonddak porzôll dita tem rosroxit tel ani mon’xak ghottai dita to unddo.
16. Vhodd-vhodd rukh, Sorvesporan lailole Lebannonache devdhar, dhadoxi zai-sôr pausachem udok ghetat;
17. tancher sovnnim aple ghontter kortat, rukhanchê tonkxer ravtat kensar.
18. Dongrancher bokddeank mellta asôr, ani khoddpam modem liptat sonxe.
19. Mhoineache mhoine nemunk Tunvem chondr rochlai, suriak aplo ostomcho vêll kollta.
20. Tum kallôk ghaltai tednam rat zata ani ranantlim savzam hevxin-tevxin firunk lagtat.
21. Xinvache pette gorozun xikari sodunk bhonvtat, apnnank-ui khaunk ghal mhonn Deva lagim magtat.
22. Suria udenam fuddem te portun vetat, apleam ddholimnim nidunk chol’le.
23. Monis aplea dhondeak lagta, sanz zai-sôr aplo vavr korunk chol’lo.
24. Kitlim vichitr Tujim kortutvam, Sorvespora, Kelái tem sogllem zannvaien kelái. Tujeam rochnnamnim prithum’ upott bhôrlea.
25. Ho polle doria kitlo lamb rund: tantum firtat hixpa-bhailim jivannim, vhoddle dhaktte pranni.
26. Tantum bhonvtat ghunvtat tarvam, tantum khellta Leviathan, Tunvem rochlai to rakhôs.
27. Favo tea vella Tum jevonn ditoloi mhonn sogllim Tujer dolle lavunuch asat.
28. Tum jevonn ghalit asai ani tim punzaitat; Tuzo soddôll hat ugôddtai, ani tankam pott-bhôr mellta.
29. Tum tondd mat dhamp, tim ghabortat; Tum prann mat kadd, tim morun dhullint portotat.
30. Punn Tuzo svas sôddxi zalear, tim rochun ietat ani prithumechem rup Tum novem kortai.
31. Sorvesporak mhoima sodankal! Sorvesporak Apleam kortutvamnim sontôs mellum.
32. Tachi nodor mat poddlear prithum’ thorthorta; Tachem bottuch laglear porvotantlo bhair sorta dhunvôr.
33. Sogllea mhojea jivitant Sorvesporak gitam gaitolom, jiv aso-sôr mhojea Devak monzull nad rochun kaddtolom.
34. Zoso Sorvespora sovem asa mhozo sontôs, toxim him mhojim utram Taka sontôs dium.
35. Patki mon’xam sonvsarantlim nopoit zaum, noxtim mon’xam hea fuddem nanch zaum. Otmea mhojea, Sorvesporachi stuti kor. Zoi, zoi Sorvespor!
