1. Devachea bhurgeamnô, Sorvesporak mhoima diat! Sorvesporachi mhoima ani podvi vollkhun gheiat,
2. Tachea Nanvak favo ti mhoima Sorvesporak diat, Tachea povitr Mondirant Sorvesporak pornnipat korat!
3. (a) Sorvesporacho tallo udkam vhoir gazta, Mhoimevont Devacho ghonnghonn suttlo, doriachê lharam-osaddicher Sorvespor ubo zala!
4. Sorvesporacho tallo kitlo ghonnghonnit! Kitlea dobajean gazta Sorvesporacho tallo!
5. Sorvesporacho tallo devdar fanttoun uddoita, Sorvespor fanttoun uddoita Lebanache devdar,
6. ani Lebanak To eka paddkulea bhaxen uddiô mari-so korta, Sirionak eka reddkea vori Uddkonnam ghali-so korta.
7. Sorvesporacho tallo dhogdhogit viz-zhoglavnnim sôddta!
8. Sorvesporacho tallo aikun oronneant bhuim kampta, Kadêsh oronneachi bhuim Sorvespor foddfoddaita!
9. (a)Sorvesporachea tallean sindurache rukh thorthortat, ani sal ani panam zhoddon ranantlim zhaddam vingllim zatat. (9b)Tachea Mondirant soglleancho ho êkuch sad gazta: "Mhoima!"
10. Doria-sagora voir Sorvesporan xinvason manddlam, sasnnak Raza koso Sorvespor xinvasonar bosla.
11. Sorvespor Aplê porjek ghottai ditolo, Sorvespor Aplê porjecher xanticho axirvad ghaltolo.
