1. Sorvespor mhozo Uzvadd, Toch mhozo Tarôk: konnachich mhaka bhirant na! Sorvespor mhojea jivitacho kil’lo; konnachêch mukhar hanv kampona.
2. Jedna noxtte monis boll korun mhojem angmas gillunk sôdtat, tedna mhojer add ietat tech, mhoje dusman, adolltat ani aptton poddtat.
3. Kedim-i loskoram mhojê mukhar ubim ravum, mhojem kalliz ghôtt ravtolem! Zhuz loddai mhojer upraslear porian, thir astolo mhozo otmo!
4. Sorvespora lagim hanv ekuch magtam, hi êkuch mhoji axa: sogllea mhojea jivitant Sorvesporachea Ghorant korunk mhojem tthikann,Sorvesporachi gôddsann chakun bhogunk, Tachea mondiracher dolle laun ravunk!
5. Thoim Aplea mattvant mhojea akantachea disa To mhaka asro ditolo; bhitôr Aplea tombunt mhaka lipoitolo, khoddpacher mhaka uklun dovortolo.
6. Ani atam mhaka veddho ghaltolea xotruncher mhoji tokli unch ukoltolom, ani Tachea tombunt zoita-anondacho iôdn bhettoitolom. Gaionam gavun, vazontram vazoun, Sorvesporachi tust kortolom.
7. Sorvespora, Tuka ulo martam: mhaka aik! Mhoji doia kôr! Mhaka zap di!
8. Tujê vixim mhojem kalliz mhaka sangta: Tachem mukhamoll sôdit rav! Tujench mukhamoll sôdit asam, Sorvespora!
9. Tujem mukhamoll lipoum naka! Tujea chakrak ragan poro ghalum naka! Tujê xivai mhojea adarak konn na! Mhaka sanddum naka, mhaka sôddum naka! mhojea Deva, mhojea Taroka!
10. Avoibapui ghoddiê mhaka sanddun vochot, punn Sorvespor mhaka vengent ghetolo!
11. Sorvespora, Tuji vatt mhaka dakhoun di, borea-nivôll margan mhaka choloi, kiteak dusman mhojê pattik lagleat.
12. Mhaka gillunk sôdtoleanchea hatant mhaka sôddum naka. Lottik sakxidar mhojer uprasleat, tancho bafuch ragan zollta.
13. Hem hanv khatren zannom: Jivea mon’xanchea desant Sorvesporachi doiamoia mhaka bhôgunk melltoli!
14. Sorvesporacher visvas dovor: thir rav, kalliz ghott dhôr ani Sorvesporacher patieun rav!
