1. Mhojea kallzantlim vhanvtat nazuk utram: razachê kirtik hanvem git rochlam; xitab-huxar boroupiachê lekhnnê sarki suddsuddit zalea jib mhoji.
2. Mon’xanchea putam modem, tujê itlo rupvont konn nam, tujeam onttantlean gollta modhurai, kiteak Devan tuka nitekallim sudoiv kela.
3. Torvar tuji penkttak band, bollvont vira! Dakhoi tuzo protap ani tujem voibhov!
4. Chol, sot ani nit rakhunk tujea zoirothar bosun chol! Ut’tom’-xrextt kortutvam tujea uzvea hatan korun ghe!
5. Dharen barik tuje dhonu; tujê adhin poddtat porza, razachea dusmanache hatpãi golltat.
6. Tujem xinvason, Deva, sasnnachea sasnnak togtolem, promannikponnan Tum razvôtt choloitoloi.
7. Promannikponnacho Tum môg kortai ani khotteponn vittetai. Dekhun sogllea tujeam vangddiam modlo voir kaddun Devan, tujea Devan, anondachea telan tuka makhlo.
8. Gondrosachea ani musamborachea pormollan domdomit zaleant tujim angvostram. Tujea hostidantachea razmondirant vazpi-gavpi tuka nondoitat.
9. Razkunvornni tuka noman korunk ietat, Ofirchea bhangaran nettoiloli tujea uzveak boslea ranni.
10. Aik, dhuvê, chotrai dhôr, mhojea utrank kan di. Tuzo ganv-lôk visor atam, tujea bapaichem ghor sôddun ie.
11. Oxem tujê suropaiek bhultolo raza Tuzo poti to, tachi seva-bhokti kôr.
12. Tiracho lôk tuka danam-kannikô gheun ietolo, grestantle grest monis tuje upkar zôddunk sôdtole.
13. Olonkaramnim xringarloli ieta razachi dhuv! Choliô-kapddam tichim bhangaran bosoil’lea motianchê zorichim.
14. Raza sorxim tika vhortat, tichea sangata kunvornnincho hôr:
15. Anondachea sontosachea ul’lasamnim tankam vhortat; razachea mondirant kunvorni provês kortat.
16. Tujea purvozanchea zagear tuka atam melltole put, sogllea sonvsaracho odhikar tanchê adhin kortoloi.
17. Pinddkechê pinddkent tujea nanvachi kirti porgôtt’tolim: dekhun raxttram tuka vakhanntolim sasnnachea sasnnak!
