1. Sorvesporak dhin’vasunk favo! Kin’noriô vazoun, Tujea Nanvachi kirti gazounk favo, Bhov Vortea Deva!
2. Dha taranchê kin’noriê ani vinnea soit, sitarachea modhur sovonan
3. sokallim Tuzo môg porgottunk ani rat-bhôr Tujea visvaxiponnacho prochar korunk favo.
4. Tujeam kortutvam vorvim, Sorvespora, Tum mhaka anondbhorit kortai, Tujeam hatancheam kornniam mukhar hanv sontosan ul’lastam:
5. “Kitlim mhonn xrextt Tujim kortutvam, Sorvespora, Tthav-naxil’leô Tujeô ievzonnô”
6. Mond moticheam mon’xank oslem kãich kollonam, ginean naxil’leank oslem kãich somzonam.
7. Tonna vori noxtte monis matlear matum, papi soglle rosroslear rosrosum, sasnnak tanchem ghorttann zatolench!
8. Punn Tum, Sorvespora, Xrêxtt-Vorto sasnna-sasnnak,
9. Tuje dusman polle, Sorvespora, Tuje dusman koxe padd zatat polle, Soglleam papianchi pollapoll zatoli.
10. Ran’reddea sarkem Tunvem mhaka boll dilãi, nitoll xitoll telan Tum mhaka makhtai.
11. Mhoje dusman poddlole polleun mhoje dolle bhagi, noxtteanchea ghorttannachi khobor aikun mhoje kan sudoiv.
12. Promannik monis madda vori vostolo Lebanacho devdhar koso to vaddtolo.
13. Sorvesporachea Ghorant romplole, amchea Devachea angnnant osle monis mat’tole.
14. Mhatarê piraier legun te follam ditole, ttokttokit rosroxit te togtole.
15. Sorvespor promannik mhonn te porgôtt’tole. Koslich khôdd Taka nam, To ekloch mhojem Khoddop.
