1. Sorvespor mhojem Khoddop: hanv Taka vakhanntam! To mhoje hat zhuzak toiar korta, mhojim bottam loddaiek aitim korta.
2. To mhozo Môg, mhojem Kott’tt, mhozo Kil’lo, mhozo Tarôk, Ddhal mhozo, Xeronn mhojem! Raxttrank To mhojê adhin korta.
3. Monis konn, Sorvespora, Tunvem tachi porva korcheak? Matiecho put konn, Tunvem tacho ugddas korcheak?
4. Mon’xacho jiv mhollear vareachi funk, tache dis savllê vori nanch zatat.
5. Sorvespora, Tuzo sôrg denvoi ani amchê tthaim sokla ie! Porvotank tunvem hat lailear puro, tancho zatolo dhunvôr.
6. Tuje viz sôdd dusmananchi duspôtt zaum-di; Tuje bhale sôddun mar te kolkoltole!
7. Voir thaun Tuzo hat di, mhaka uklun kadd, udkanchea lottantlo mhaka nivar, porki lokanchea chopkeantlo mhaka soddoi.
8. Tanchea tonddantleô fokot fotti bhair sortat, lottik govai diunk aplo uzvo hat ubartat!
9. Tujea manak, Deva, novem git rochun gaitam, dha taranchê kin’noriecher Tuji kirti gazoitam.
10. Tunch razank zoit ditai, Tunvench Tujea sevoka Davidak nivarlai.
11. Nixttur mon’xancheô torvari mhojê thaun pois kôr, porki lokanchea chopkeantlo mhaka soddoi. Tanchea tonddantleô fokot fotti bhair sortat, lottik govai diunk aplo uzvo hat ubartat!
12. Amche put aplê tornnê piraier rosroxit rukham sarke ghott vaddom, razmondir soboitolea konnxea-khambeam vori amcheô dhuvô.
13. Sogllea jin’sanchea orovan upott bhorom amche kodde; amchea xetam-bhattamnim choddum amcheô xelliô hozaranchea hozaramnim!
14. Amchim gorvam puxtt ani ghott zaum, amchea xaranchim durgam thir ubim asum, pordesache tollmolle anink nakatuch, Saiba, amchea nakeam-tintteancher naka anink roddnem ani vilap!
15. Oslea denneamnim bhòrloli porza khorench subhagi! Jicho Dev Sorvespor, ti porza khorench bhagi!
