1. Borea mon’xamnô, Sorvespora mukhar sontosache ul’las sôddat: promannik kallzachea mon’xank osli vakhann’nni sobta.
2. Sitar vazoun Taka dhin’vasat, dha taranchi kin’nori dhôrun Taka sodgitam gaiat.
3. Tachea manak ek novem git rochun gaiat. Sogllê tumchê hikmotin, stotram-gaionamnim Tachi vakhann’nni korat.
4. Sorvesporachem utor khorench khorem, sogllim Tachim kortutvam visvaxiponnachim.
5. Nit ani promannikponn, him don-ui Tachea mogachim, Sorvesporachê pritin sonvsar upôtt bhòrla.
6. Sorvesporachea utrak mollob ghoddon ailam, Tachea tonddantlea suskaran ontrallachim sogllim loskoram upzoleant.
7. Tannench doriachim udkam dabeant koxim bhôrun dovorleant ani somdirachim udkam ximam bhitôr zomoileant.
8. Ak’khi prithum’ Sorvesporachi bhokti korum, sonvsarant jietolim sogllim Tachem vondon korum!
9. Ekach utran Tannem sogllem rochlam, Tannem hukum’ ghalo ani asa tem sogllem vortun ailem.
10. Raxttrancheô manddnniô Sorvespor fiskottaita, porzancheô kolpona To nirfoll korun sôddta.
11. Punn Sorvesporachi manddavôll sasnnachi, Tachea Kallzache otrek sonstichê sonstik togtat.
12. Sorvesporak aplo Dev mhonn vollkhota ti porza bhagi: oslê porjek Aplem daiz korun Tannem vinchun kaddlea.
13. Sorgar thaun Sorvespor nodor ghalta, sogllem mon’xakull Tachea mhoreant asa;
14. Prithumer jietat titleancher-ui Aplea tthikannant thaun To dixtt ghalta.
15. Tanchim soglleanchim kallzam akarta ani soglleô tancheô kornniô boro vollkhota to Toch!
16. Vhoddli fouz zomoili mhonn razak apxim zoit mellona, ani zhuzariachem vhoddlem boll taka rakhunk pavona.
17. Zoit vhorunk ghoddeacher visvas dovorloi zalear, tuzo visvas nirfôll polko: kitlo-i bollixtt to zaum, tuka nivarcho na.
18. Sorvesporachi konn bhokti kortat, Tachea maiêmogacher konn visvas tthevtat, toslea mon’xancher Tachi nodor boslea:
19. Toch tankam mornnantlim soddoitolo, Toch tankam dukollachea kallar dhanno ditolo.
20. Amcho otmo Sorvesporachi vatt polleunuch asa: Tachê bhair amkam adar na, rakhonn na;
21. Tachêch sovem kallzak sontôs bhògta, Tachea povitr Nanvacher ami patieun ravtanv.
22. Zoso Tujer amcho visvas, Sorvespora, toxi amcher denvum Tuji priti!
