1. Sorvespora, Tunvem mhozo tthav ghetlai, Tum mhaka vollkhotai;
2. hanv kedna bostam ani kedna utthtam, tem Tum zannai; mhojea monantlim chintna pois thaun Tuka tthavim!
3. Hanv choltam va add poddtam, tem Tum polletai; soglleô mhojeô kornniô Tujê mukhar ukteô!
4. Mhojê jiber utor pavunchê adim Tum, Sorvespora, tem sarkem vollkhotai!
5. Pattlean mukhailean mhaka veddho ghaltai, Tuzo hat-ui mhojer dovorlai.
6. Oslê zannvaiek mhojem ginean pavona; ti itli unch, mhojean ti attapunk zaina!
7. Tujea Atmea koddcho khoim mhonn pois sorun vochum? Tujea mukhavelo khoim mhonn pollun lipum?
8. Sorgar choddun gelear, Tum asai thoim; Norkant poddun ravlear, Tunch mhojê mukhar!
9. Pakhotte lavun, Udenti vatten uddun vochon zalear, doria utrun Ostomtê vatten biradd sôdun kaddlear,
10. thoinsor-ui Tuzo hat mhojer denvta, Tuzo uzvo hat mhaka ghôtt dhôrta!
11. Kallôkh mhaka lipun dovrum, ani mhojê bhonvtonnim uzvadd ratcho andhar zaum:
12. oxem mhonnon zalear, to kallôkh Tuka kallôkh nhoi, kiteak Tujea dolleam mukhar rat, disa vori porzollta: andhar ani uzvadd Tuka ekuch!
13. Sandhean-sandho mhoji kudd Tunvem ghôddleai, mhojê avoichea kusveant Tunvem mhaka vinnlai.
14. Mhojem soimb mhollear ek ojap, sogllim Tujim kortutvam ojapanchim: tanchê khatir Tuka dhin’vastam.
15. Mhaka guptim akartaloi tedna ani bhuimchea gopant mhoji kudd ghôddtaloi tedna, mhoji Tuka poripurnn vollokh asli, mhojê prokrutichem kãich Tuka gupit naslem.
16. (a)Tujea dolleamnim mhojeô kornniô dekhloleô, (16b)soglleôch Tujea pustokar boroun asloleô. (16c)Tunvem manddun dovorlolei.
17. (a)Ekan-êk mhoje dis, êk porian udeunchê adim, (17b)Tujim chintna, Deva, mhaka êk vhôdd gutt! (17c)Sumar kelear, mezum nozo titlim!
18. Lêkh korunk gelear, renvechea konniam poros chodd, ani mezun kaddlim zalear-ui, hanv Tujê mukharuch asam!
19. Khottea mon’xank jivexim marun uddoixi zalear, kitlem borem zatem, Deva! Prann ghatkiamnô, mhojê sorxile pois vochat!
20. Tuji polle te ninda kortat, Tujeô ievzonnô kãich nhõi kortat.
21. Tuzo dvês dhôrtoleancho, Sorvespora, mhaka kanttallo bhògta ani Tujer uprastat tanchi mhaka ubgonn ailea.
22. Hanv tancho nigut dvês dhôrtam, atam mhoje-i dusman te.
23. Deva, mhoji choukoxi kôr ani mhojem ontoskornn topasun kadd, mhoji porikxa kôr ani mhojim chintna vollkhun ghe.
24. Vankddea margan hanv cholona mhonn polle, ani sasnanchea jivitachea margar mhojim panvlam ghal.
