1. Devak vhoddlean ulo martam, vhoddlean ulo martam Devak, ani To mhaka aikota
2. Mhojea akantant Pormesporachi vatt polleit ravtam, soglli rat visôv ghenastanam hat zoddun asam, mhojea otmeak koslich buzvonn naka zalea.
3. Devacho ugddas korun korun suskar sôddtam, chintun chintun jiv gelo virun.
4. Ratche bilkul dolle lagunk dinãi, mon samkench ghuspota, tonddar zap nam.
5. Adleam disancho ugddas ieta, purvinchim vorsam dolleam mukhar ubim.
6. Soglli rat kallzant niall korit asam, portun-portun tinch chintnam, ani monant hoch vichar:
7. Pormesporan amkam samkinch soddun dilim gai? To amkam anink proson’n zauncho nam gai?
8. Tacho môg saf gelo ubun? dil’lem utor sasnnak dovorlem soddun?
9. Dev doia korunk visorlo gai? rag choddlo mhunn kaklut bond keli gai?
10. Hanvem mhollem: “Sorvpodvedar Dev Apli podvi atam adlê bhaxen dakhoinam: hich mhojea kallzachi khont”
11. Sorvesporacheam kortutvancho, purvilea kallant kel’leam ojapancho mhaka ugddas porot-porot ieta.
12. Tujeô soglleô kornniô monant gholloitam, sogllim Tujim ochoriam niallit asa.
13. Deva, Tujeô vattô povitr! Amchea Deva itlo thôr anink khôi asa dêv?
14. Ojapam kortolo Dev Tum, raxttram modem Tunvem Tujem boll dakhoilêi
15. Tujea bavllean Tujê porjek soddoilii, Jakobacheam ani Zuzecheam bhurgeank suttka dilii.
16. Udkamnim, Deva, Tuka dekhlo, dekhnam fuddem udkam pattim sorlim, somdiracher ailo thorthoro.
17. Kupantle denvle pausache ghoghe, mollbantlo avaz ghonnghonnlo, Hevtten tevtten Tuje bhale suttle.
18. Mollbar ghunvun Tuzo goddgoddo khonnkhonnlo, Tujeam zoglamnim prithumecher uzvadd fankoilo, prithum’ thorthorli, bhũi kampli.
19. Doria modlean Tum cholun aioli, somdirantlean panvlam ghalun ailoli, punn Tujeam panvlanche mag konnench dekhle nant.
20. Moizesachea ani Aaronachea hatan, xellianchea hindda vori, Tunvench Tujê porjek vatt dakhoilii.
