1. Noxtteanchea chopkeantlo mhaka suttoi, Sorvespora. Zobordosti kortolea mon’xanchea zulumantlo mhaka rakh ani samball.
2. Bhitorlean te vaitt korunk ievjitat, dis-bhôr zhogddim zhuzam kolpun asat.
3. Sorpa vori pazloleô tancheô jibô, onttantlean gollta furxeachem vikh.
4. Noxtte monis mhojea angar poddtat: Sorvespora, mhaka nivar. Zulum’ kortoleanchea chopkeantlo mhaka vattai. Te polle mhaka dhuklun uddounk ievjitat.
5. Hanv babddo mhojê vatten vetana mhaka sampddaunk gorvi monis choriam fas manddtat, zall korunk tãnnim doram bandleant.
6. Hanvem Tuka sanglolem asa, Sorvespora: Tum mhozo Dev! Tuka ulo martam, Sorvespora, mhojê bobek kan di!
7. Sorvespora, mhojea Dhonia, mhojea bollvont Adara, zhuzachea vellar tum mhoji tokli rakhtai.
8. Khottea mon’xanchea ievzonneank palov dium naka, Sorvespora, tancheô manddnniô xarti pavunk dium naka.
9. Mhojê bhonvtim ghunvtat te nak fuloitat, tanchea utranchi vikottai tancheach mathear poddum.
10. Inglleancho paus tancher rokoi, anink kodinch portun utthona-xe tankam fonddant xevttun uddoi.
11. Fottkirê jibeche monis sonvsarant kodinch nondona zaum, zobordosti kortoleanchi moro porian vaitt ani noxtt patt sôddina zaum.
12. Sorvespor dublleam khatir farikponn ghetolo, goribank nit korun ditolo.
13. Khorench, borim mon’xam Tujem Nanv vakhanntolim, promannik kallzachim mon’xam Tujea mukhamollachea uzvaddant tthikann korun jietolim.
