1. Deva, mhojem magnnem aik, mhojê vinontik patt korum naka,
2. mhaka chit di, mhaka zap di, itlea huskeam modem mhaka tharna!
3. Dusmananche goroz aikun, patkianchi bob kanar gheun, hanv babddo kolkoltam! Mhojea mathear ghaltat vignam, ragabhorit zaun poddtat mhojea angar.
4. Hodd’ddeant mhojea kalliz kollvollta, mhojer poddta mornnacho akant.
5. Mhaka bhem dista, mhojer aila kolkolo, ang mhojem xirxirta.
6. Parveachim pakam zôr mhaka dil’lim, hanv uddun vetom ani svost ravtom.
7. Pois-pois pollun vetom ani oronneant biddar kortom.
8. Upraslolea khôr vareantlo ani vadollantlo dhanvim-dhanvim asôr sôdun kaddtom.
9. Teô katrun uddoi, Dhonia, mhojea dusmanancheô fottkireô jibô! Xarant fokot zobordosti ani zhogddim;
10. Xarachea kott’tta-durgam voilean dis-rat tellun firtat. Vikottai ani noxtteponn, itleanuch bhòrlam xar!
11. Bhitôr sogllêch vatten ibadd; margam tintteam modem sodam zulum’ ani ghatkeponn!
12. Dusmanan zôr mhaka okman kel’lo, sôsunk kotthin nhoi aslem; mhozo virodhi zôr mhojer upraslolo, mhojean lipunk zatalem.
13. Punn tum mhozo boraborcho, mhozo kallzacho ixtt!
14. Kitli datt amchi ixttagôt! Mirovnnukek hatant hat ghalun Devachea Ghorant choltaleanv ami!
15. Moronn tancher ovchit ieum! Jivech te Norkant poddum! Kiteak vikottai vosta tanchea ghorant, riglea ti tanchea kallzant!
16. Hanv mugelo Devak ulo martolom ani Sorvespor mhaka nivartolo;
17. sanjecho, sokallcho, don'parcho pinrgun vilapun ravtolom ani To mhojê bobek zap ditolo.
18. Kitle-xe mhojê pattik lagleat! Punn mhojê lagim zhogoddtat tanchea hatantlo mhaka sôddoun, mhojea otmeak To xanti ditolo.
19. Sasnna thaun razvôtt choloita to Dev mhojem magnnem aikotolo ani tanchem gorv môddtolo;apli chal bodlunk te toiar nant, Devachem bhem tankam na.
20. Tea ghatkian ixttancher hat ubarla, dil’lem utor tannem môddlam.
21. Ulovop tachem lonnie poros mov, punn kalliz zhuz manddunk toiar. Utram tela poros bullbullit punn khorench mhollear dharicheô torvarich!
22. Sorvesporachea Kallzant ghal tuje huske: Toch tuka samballtolo. Sugunni mon’xak To kodinch poddunk-halunk diuncho na.
23. Punn Tum, Deva, mornnachea khonddant tankam xevttun uddoitoloi. Darunn ani ghatki mon’xanchi jivita-dori ordakuch tuttoitoloi. Punn mhozo visvas sogllo Tujeruch tthevtam, Dhonia!
