1. Tum Israelacho Gonvlli, Tum rakhnno koso Zuzek vatt dakhoitai, tôr aik amkam! Kerubim voir xinvasonar Tum bosun asai
2. Efarim, Ben’jamin ani Manas’se hancher Tujea mukhamollacho porzôll fankaoi. Tujem boll ugteponnim dakhoi, amchi soddvonn korunk ie!
3. Dolbharanchea Sorvespora, amkam portun ektthãi kôr, Tujea mukhamollacho porzôll amcher poddum-di ani amkam soddvonn melltoli
4. Dolbharanchea Sorvespora, kednam porian Tuzo rag zolltolo? Tujê porjechea prarthonak kednam porian patt kortoloi?
5. Khannak mhollear dukancho unddo tika diloi, ani pivonnak upott bhôrlolem dukanchem patr.
6. Tujeach nirmonnan bhonvtonncho lôk amkam girasunk apnnam modem zhogddim kortat; ani moskoriô korun dusman amkam hanstat!
7. Dolbharanchea Sorvespora, amkam portun ektthãi kôr, Tujea mukhamollacho porzôll amcher poddum-di ani amkam soddvonn melltoli
8. Ejiptantli umttum êk dak-vêl Tunvem haddlii, raxttrank dhanvddaun Tunvem ti lailii.
9. Tunvem zomin aiti kelii; tinnem pallam ghetlim ani fantteun fantteun sogllo ganv bhôrlo.
10. Porvotancher tichi savlli poddli, matun matun ti unch-unch devdharancher choddli.
11. Ticho fantto doria porian pavlo, nodi porian vistarleô ticheô ankriô
12. Kiteak tôr atam tiche adde Tunvem moddun uddoilei? Vatter vetat titlim-i hat ghalun dakõ kaddtat,
13. ran’dhukôr polle koso duspôtt korta, xetantlim savzam ticho palo nanch kortat!
14. Dolbharanchea Sorvespora, ami prarthun magtanv, amchê-xim portun ie! Sorgar thaun nodor mar, hê tujê dak-velik kitem zalam tem polleunk ie!
15. Tujea uzvea hatan lailolê dak-velik ballgun samball!
16. Mon’xamnim ujean lasun ticho bhosm kelo. Tujea mukhamollachi dhomkavnni tancher poddun tanchoch bhosm zaum!
17. Tujea uzveak bosoilolea puruxacher, Tunvem bollixtt kel’lea mon’xacher sodanch Tuzo hat dovor,
18. Anink kodinch Tujê sorxillim ami koddsorun vechim nanv; amkam novean jiv di ani Tujem Nanv ami vakhanntoleanv,
19. Dolbharanchea Sorvespora, amkam portun ektthăi kor, Tujea mukhamollacho porzôll amcher poddum-di ani amkam soddvonn melltoli!
