1. Zoi, zoi Sorvespor! Sorgar thaun Sorvesporachi stuti korat, Unch mollbar Tachi vakhann’nni korat!
2. Taka vakhannat, soglle tumi, Tachea dutamnô! Soglle tumi, Tachea dolbharamnô, Tachi vakhann’nni korat!
3. Taka vakhannat, suria ani chondrima; tumi sogllim, bigbigit noketramnô, Tachi vakhann’nni korat!
4. Taka vakhannat, unchantlea unch sorga, ani mollba voir axil’lea udkamnô!
5. Sorvesporachem Nanv tim vakhannum, kiteak Tachea utrak sogllim rochun aileant.
6. Tannench tankam bosoileant ap-aplea zagear sasnnachea sasnnak: Tannem dil’li manddavôll kodinch halona tosli.
7. Prithum’ Sorvesporachi vakhann’nni korum: doriantle rakhos ani khol-khol sagor;
8. uzo ani korveancho paus, him’ ani mhurem, ani Tachi khuxi palltolo vadollacho varo;
9. soglle porvot ani dongor, follanche rukh ani soglle devdar;
10. ranantlim savzam ani sogllim gorvam, jivannim ani varear firtolim sukhnnim;
11. prithumêvele raza ani soglleô porza, kunvor ani sonvsarantle soglle mon’subidar;
12. zanntim ani nenntim, tornnatim ani mhatarim, chedde ani cheddvam toxinch supurlim bhurgim ani dudachim ballkam.
13. Tim sogllim Sorvesporachem Nanv vakhannum, kiteak Tachem ekleachench Nanv thor-vortem! Sorga ani sonvsara poros vhôdd Tachi mhoima!
14. Aplê porjechem boll ani podvi To vaddoita. Tachi stuti kortat soglle Tache bhokt, Israelachim bhurgim, Tannem vengent ghetloli porza!
