1. Sorvespora, borea kallzachim magnnim aik, mhojem prarthon aikun ghe, mhojê vinovnnek kan di: mhojea onttancher fôtt na, lobaddina.
2. Tum mhaka ditoloi favo to nivaddo: sot tem Tujea dolleam mukhar uktem.
3. Mhojea kallzacho tthav ghe, ratcho mhoji chovkoxi korunk ie, mhaka kosak lavun topasun kadd: mhojem kitench vaitt Tuka mellchem na.
4. Heram mon’xam vori utramnim hanvem patok korunk na. Tujea tonddantlim utram hanvem samball’leant;
5. Somurtichi vatt hanvem dhôrlea, Tujea margar mhojê pãi ghott dovorleat, mhojim panvlam halonk nant.
6. Ho polle hanv asam, Tuka ulo martam: Tum mhaka zap ditai,Deva! Mhaka kan di, mhojim utram chit diun aik.
7. Tuka xeronna ietoleank Tum nivartai: tôr Tuzo vhôdd môg atam sobhêmazar dakhoi!
8. Tujea dolleantlê bhaulê vori Tum mhaka rakh, Tujea pakhotteanchê savllent mhaka lipoi.
9. Mhojea angar poddtoleanchea hatantlo mhaka nivar. Mhozo ghat gheunk mhojea dusmanamnim mhaka veddho ghala.
10. Darunn zaleant tanchim kallzam, gorvan bhòrleat tanchê gal.
11. He polle mhojea angar ietat, mhaka veddho ghaltat. Mhaka dhornnir apttunk dolleamnim tel ghalun dis-rat pahro kortat.
12. Dakul marunk toiar axil’lea xinva bhaxen, vô lipun ravlolea, ukoddeam boslolea xinvachea pettea vori te ravtat.
13. Utth, Sorvespora, tanchea tonddar mar! Tankam xevttun uddoi! Tuji torsad ubar ani patkiachea hatantlo mhozo jiv nivar!
14. Mon’xanchea hatantlo Tujea bavllean mhaka soddoi. Zanchem daiz ani sukh hêch jinnent asa, toslea mon’xanchea chopkeantlo mhaka nivar. Tujea gudanvantlem kaddun tanchem pott bhorom-di, tanchim bhurgim-ballam dhadoxi zaum-di, ani aplê sonstik dovrunk tanchi grestkai odik-ui vaddom-di.
15. Hanv zalear, promannikponnan cholun Tujem mukhamoll bhôgunk pavtolom; ani mhojê dolle ugòddtana, Tujem dorxon gheun, dhadoxi zatolom!
