1. Sorvespora, hanv Tuzo môg kortam, Tum mhojem Boll!
2. Sorvespor mhojem Khoddop, mhojem Kott’tt; mhozo Soddvonnar mhollear mhozo Devuch! To mhojem Khoddop: hanv Taka xeronna ietam. To mhozo Ddhal, mhozo bollixtt Adari, Mhozo Kil’lo, mhozo Asro!
3. Taka sogllo man favo. Sorvesporak ulo marina fuddem, mhojea dusmananchea hatantlo To mhaka nivarta.
4. Mornnachim lharam sobhonvtim mhojer upraslim, nattak korpacho lôtt mhojea angar ailo;
5. Norkachea sankllimnim mhaka bandlo, mornnachea bandpasamnim mhaka dhôrlo!
6. Akantachea vellar hanvem Sorvesporak ulo marlo, adar di mhonn mhojea Devak prarthon kelem; Aplea Mondirant-sun Tannem mhozo tallo aikolo mhoji bob Tachea kanant poddli.
7. Tedna prithum’ hal’li ani thorthorli; buniadi soit dongor kudd’kudd’le, Tachea bhõikor raga mukhar te kample!
8. Tachea nakachea puddantlean dhunvôr bhair sorlo, ani Tachea tonddantlo khôr-khôr uzo; tea dhogan zollvak pettlo uzo!
9. Mollob bagaun To sokla denvlo, Tachea pãiam tolla kallem-kitt kup.
10. Eka Kerubicher bosun vareachea pakhotteancher To ubun ailo.
11. Kallokhacho Apnna bhonvtonnim Tannem êk podd’ddo kelo, kupanchea kallkhiam udkancho kelo Aplo tombu.
12. Tachê mukhar loklokit porzôll suttlo, teach borabor fatrancho paus ani ujeache kollxe.
13. Mollbar Sorvespor ghoddghoddlo, Bhov Vortean Aplo tallo aiko-so kelo.
14. aplê bann sôddun, dusmananchi keli duspôtt; viz sôddle ani tankam dhanvddaile.
15. Jea vellar, Sorvespora, Tujê dhomkavnnecho avaz ghonnghonnlo, ani Tujea nakantlean ragacho dhunvôr suttlo, tea vellar doriachi bhatti dixtti poddli ani prithumechi buniad porian zali ukti!
16. Unch thaun voddôv ghalun Tannem mhojea hatak dhôrlo ani avorachea lottantlo mhaka ubarlo.
17. Mhojea bollixtt xotruchea chopkeantlo, mhojê poros xoktivont dusmanachea hatantlo Tannem mhaka oddun kaddlo.
18. Mhojea vigna-on’varachea disa te mhojea angar poddle, punn Sorvesporan mhaka samball’lo;
19. Tannem mhaka soddoilo, mekllo kelo, mhozo môg korta dekhun mhaka nivarlo.
20. Sorvesporan mhojea promannikponnachem mhaka foll dilem; mhojê hat nitoll mhonnun, Tannem mhojer axirvad ghala.
21. Kiteak hanv Sorvesporachê vatten chol’lam, ani mhojea Deva koddcho hanv pois sorunk na.
22. Tachê nivadde soglle mhojê mukhar asat, Tachea hukumanchi hanvem beporva korunk na.
23. Tachê mukhar hanv promannikponnan chol’lam, patka-koddcho hanv pois ravlam.
24. Promannikponnan chol’lam dekhun, Tachea dolleam mukhar mhojeô kornniô nitoll dekhun, Sorvesporan mhaka favo tem map dilam.
25. Visvaxiponnan choltat tanchê thaim Tum-i visvaxi, sopurnnaien jietat tanchê thaim Tum-i sopurnn.
26. Nirmôll-bholea mon’xa thaim Tum-i nirmôll-bholo, punn naddbudhi kortoleam thaim Tum odik budhvont.
27. Khalteank Tum hat ditai, punn gorvan bhòrlole dolle Tum pilltai.
28. Sorvespora, Tunch mhoji divtti, mhojea kallokhant mhozo Dev mhozo Uzvadd!
29. Tum aslear, soglleô addkholli hanv môddun uddoin; mhozo Dev aslear, khoinchea-i kott’ttachim durgam hanv choddon.
30. Kitlea boreponnan amcho Dev amkam vagoita! Sorvesporachem utor nirbhel bhangar. Apnnak xeronna ietolea somestanchi, Apunnuch tancho ddhal zaun, rakhonn korta.
31. Khoim tôr Sorvespora bhair Dev asa? Khoim tôr amchea Deva bhair Khoddop asa?
32. Devan mhojea penkttak Aplêch ghottaiecho pott’tto dilo ani purnn promannikponnachea margar mhaka choloilo.
33. Mhojê pãi kele mervachea pãiam sarke suddsuddit, porvotancher mhaka thir ubo dovorlo.
34. Mhojê hat Tannem zhuzak toiar kele, toxench mhojê bavlle kanxeacho dhonu bagaunk ghottaile.
35. Mhojem taronn korunk Tunch zaloi mhojê rakhnnecho ddhal; Tujea uzvea hatan mhaka samball’loi, opurbaien Tunvem mhaka vaddoiloi.
36. Mhojea panvlank Tunvem rund marôg korun diloi, mhojê pãi kodinch hal’le nant.
37. Mhojea dusmananchea pallank lagun tankam sampddaitam, tancho nas kelea bogor hanv kodinch portona.
38. Anink ube zainant toxe hanv tankam zomnir apttitam, mhojea pãiam tolla te poddtat.
39. Zhuzak Tunvem bollacho komorbond mhojea penkttak bandloi, mhojea virodhiank mhojê khal damun dovorlei.
40. Mhojea dusmanank Tunvem dhanvddailei, mhozo dvês dhôrtoleancho hanvem bhosm kelo.
41. Tãnnim bob marli, punn tankam vattaitolo konn na zalo; Sorvesporak ulo marlo, punn Tachi zapuch na.
42. Varean ubun veta dhul’l, toxi hanvem tanchi pudd keli; rosteavelea chikla bhaxen tankam pãiam tolla mostile.
43. Porjechea zhogddeantlo Tunvem mhaka nivarloi, ani raxttram voir mhaka odhikar diloi, hanv vollkhonaslolom ti porza mhoji chakri korunk pavli.
44. Mhojem nanvuch aikun, tim mhojea utrak pallo ditat; vilaiti raxttram mhozo hukum’ manun ghetat.
45. Vilaiti raxttram ang kaddtat, aplea kil’leantlim kampun bhair sortat.
46. Sorvespor mhojem Khoddop: Tachem Nanv vhodd zaum! Dev mhozo Soddvonnar: Tachem Nanv vhodd zaum!
47. Toch mhojea dusmanancho sudd gheta, Toch porzank mhojê adhin korta.
48. Ragabhorit dusmananchea hatantlo mhaka vattaitai, mhojea angar ietoleanchea mathear mhaka bosoitai, zobordosti kortoleachea chopkeantlo mhaka nivartai.
49. Hea pasot, Sorvespora, raxtram modem Tuka nanvaddtolom,Tujea Nanvachea manak stotram-gitam gaitolom.
50. Aplea razak Tannem vhoddlem zoit dilam, Apnnem venchun makhlolea razak Aplo môg dakhoila, Davidak ani tachê sonstik sodam sorvodam.
