1. Hea Tujea desacher, Sorvespora, Tuji konnvallaiechi nodor poddli, gulam’zal’leam Jakobacheam bhurgeank Tunvem soddoun portun haddlim-i
2. Tujê porjeche guneanv Tunvem bhogxilei, tichim sogllim patkam lipoun nanch kelim-i.
3. Tuzo rag Tunvem pois keloi, ragan zolltaloi to thôndd zaloi.
4. Deva, amchea Taroka, novean amkam soddoun ektthãi kôr, amchem kitem vaitt dislam tem upkar korun visor.
5. Amcher ragabhorituch astoloi sodankal? Pinddkechê pinddkent tapunuch ravtoloi?
6. Novean amkam jivont korcho nai, Dhonia? Tujê porjek anink Tujê sovem sontôs diuncho nãi?
7. Tuji kaklut amkam dakhoi, Sorvespora, ani doien amchi soddvonn kôr.
8. Sorvespor sangta tem chit diun aikotam, khorench xantichi khobor Dev sangta; Aplê porjek, Apleam bhoktank, sogllea kallzan Apnna-xim portotoleank xanti.
9. Tachi bhokti kortoleank Tachi soddvonn lagim pavlea, ani Tachi mhoima amchea Desant vostoli.
10. Môg ani visvaxiponn ekamekak bhett’tat Nit ani Xanti ekamekak vengent ghetat;
11. Visvaxiponn bhumintlem upzotolem ani sorgar thaun amcher denvtolo Niticho uzvadd.
12. Sorvespor Apunnuch amkam subhagi kortolo, ani amchi bhũi zatoli sufôll pikall.
13. Nit cholun ietoli Tachê mukhar Tacheam panvlamnim panvlam ghalun ietoli xanti.
