1. Tujea khotteam kortubanchi boddai kiteak, khottea-noxttea mon’xa?
2. Fokot peleak ibadd korunk dis-bhôr dhean-mon laun asai. Dharichea vakra sarki jib tuji, ghatkiancho bapui tum!
3. Borea kornniam poros odik tuka avoddtat vaitt kortubam, sota poros chodd tuka man’ta fôtt.
4. Fottkirê jibê, tuka môg fokot ibaddia utracho!
5. Dekhunuch Dev tuka ibadd kortolo, sasnnak tuzo bhosm korun sôddtolo, tujea biddarantlo tuka ôddun kaddtolo, pallam soit jiveanchea desantlo tuka To bhair ghaltolo.
6. Hem polleun promannik mon’xank bhem distolem, taka hansun tim mhonnttolim:
7. "Ho rê to, Devak aplo kil’lo koso ghenaslo to, aplêch grestkaiecher visvas dovrun aslo, ani khun korun-korun apunn vaddla-choddla mhonn boddai dakhoitalo to!"
8. Punn hanv zalear, Devachea Ghorant matlolea zoitunachea zhadda sarko. Konnvallea Devacher mhozo visvas aiz ani sodankal!
9. Tunvem oxem kelãi dekhun nirontorim Tuka dhin’vastolom. Tuzo môg kortoleam mukhar Tum bhov konnvallo mhonn hanv porgôtt’tolom.
