1. Tujo môg, Sorvespora, sodankal vakhanntolom, pinddkechê pinddkent Tujem visvaxiponn porgôtt’tolom
2. Tuzo môg sasnnak togta koso thir kelai mhonn hanv zannam; zoso sôrg, toxem Tujem visvaxiponn Tunvem thôi okhondd korun dovorlai,
3. Oxem Tunvench sanglai “Hanvem vinchun kaddla tachê kodden Hanvem korar kela; Davidak, Mhojea sevokak, Hanvem soput dila:
4. Tuji sonsôt sodankal togoitolom, Hanvem sthaplolem Tujem xinvason sodam-sorvodam samballtolom.
5. Mollob Tujeam ochorianchem kirton korta, Sorvespora, bhoktanchi sobha Tujem visvaxiponn vakhannta.
6. Kupam voir Sorvespora sarko konn asot? Devacheam putam modem Tachê sarko konn?
7. Bhoktanchê sobhent bhirankull Dev To, Apnna bhonvtonnim asloleam somestank thôr ani bhoikôr.
8. Sorvespora, dolbharanchea Deva, Tujê sarko konn? Tum soglloch visvaxi, Tum bollvont, Sorvespora!
9. Doriachem gorv Tunch damun dovortai, uchamboll zal’lim Lharam tum thondd kortai.
10. Tunvem Rahabak marun uddoiloi ani mostiloi, Tujea bollixtt bavllean tujeam xotrunk duspottailei.
11. Tum Dhoni sorgicho, Tum Dhoni prithumecho, Tunvem ghoddleai vosundhora ani ticher vosta titlem.
12. Ut’tôr ani dokxinn Tunvem rochleãi, Tujem Nanv aikun Tabôr ani Hermon sontosan ul’lastat.
13. Bollixtt Tuzo bavllo, ghôtt Tuzo hat, sodanch ubarlolo uzvo hat Tuzo!
14. Promannikponn ani Neai tujê sodreche khambe Môg ani visvaxiponn Tujê mukhar choltat.
15. Tujem Nanv gheun murgott’ta ti porza bhagi! Tujea mukhamollachea uzvaddant tim choltolim, Sorvespora
16. dis-bhôr Tujea Nanvacher astolo tancho sontôs, Tujea promannikponnant astolem tanchem sukh.
17. Tunch tanchi Vhoddvik, Tunch tanchem Boll, Tujeach bholeponnan amchi sokôt vaddot veta.
18. kiteak Sorvesporuch amchi rakhonn korta, amcho raza asa Israelachea Povitr Devachea hatant.
19. Purvim Tujeam bhoktank dorxonan uloun Tunvem sanglêi: “Eka viracher Hanvem mukutt ghala, Mhojê porjentlo vinchun kaddloleak Hanvem ubarla.
20. “David Mhozo sevôk Mhaka mell’lo ani mhojea povitr telan Hanvem taka makhlo,
21. Mhozo hat sodanch taka rakhtolo ani Mhozo bavllo taka ghôtt kortolo.
22. “Dusmanachi hikmôt tacher zoit vhorchi nam, khõichoch noxtto monis taka sokla uddouncho nam.
23. tacheam dusmanank tachê mukhar Hanvuch chenchun uddoitolom, tacho dvês dhôrtoleanchi Hanv pudd korun sôddtolom.
24. "Mhojem Visvaxiponn ani Mhozo Môg taka samballtolim, ani Mhojea Nanvan to zoitivont zait vetolo.
25. Doriacher porian pavoitolom tachea hatachi podvi ani nodincher tachea uzvea hatachem boll.
26. “To Mhaka mhonntolo: “Tum mhozo Bap, mhozo Dev ani mhojea taronnachem Khoddop'
27. Ani Hanv taka Mhozo malgoddo put kortolom, sonvsaracheam raiam modem Bhov Vorto!
28. “Sodankal taka Mhojem bholeponn dakhoitolom ani kel’lo Korar ghôtt togtolo
29. Tachi sonsôt Hanv nitekallim samballtolom, sorg aso-sôr tachem xinvason urtolem.
30. “Tache put zôr Mhojê Somurtichi beporva kortit ani Mhojeam kaideanchi chal zôr te sôddtit,
31. Mhoje hukum zôr te moddun uddoitit ani Mhojeô adnia nam samballtit,
32. tancheam guneanvank tonnko gheun khast laitolom ani tancheam patkank lagun tancher jerbond martolom.
33. Punn Mhozo môg tachê voilo pattim kaddcho nam ani Mhojea utrak sodam visvaxi ravtolom.
34. “Mhozo Korar Hanv kodinch môddcho nam, dil’lem utor kodinch pattim gheuncho nam.
35. Mhojê Povitrtaiechi ann hi. Hanvem soput dilo to dilo; Davidak Hanv kodinch fôtt sangcho nam.
36. “Tachi sonsôt togtoli nitekallim, Mhojeam dolleam mukhar suria vori xinvason tachem,
37. mollbar visvaxi govai Hanvem dovorlolea, sodam-sodam porzolltolea chondrima sarkem
38. Tori astanam Tunvem taka soddun diloi, kuxin uddoiloi, Tunvench makhloleacher Tuzo rag boroch pettlo.
39. Tujea sevoka kodden kel’lo Korar Tunvem môddloi, tacho razmukutt dhullint uddoun sogllo tacho man bhongoiloi.
40. Sogllim tachim kott’ttam Tunvem moddun uddoilim-i, tancheam kil’leancho nas korun sôddloi.
41. Vattêvelean vetat tim taka lutt’tat, xezari tachim khebddam kortat.
42. Tacher hat ubarunk dusmanank Tunvem podvi dilii, soglleam tacheam voiriank Tunvem dhadoxi kelei.
43. Tachê torsadichi dharuch Tunvem kaddlii, zhuza-moidanar Tunvem taka soddun diloi.
44. Tachem nanvrup Tunvem nanch kelêi, tachem xinvason dhortorer xevttilêi,
45. Tornnê piraieruch Tunvem taka mhataro keloi ani taka sarkoch lojek ghaloi.
46. Kednam porian, Sorvespora, Tujem mukhamoll lipoitoloi? sodankal? Kednam porian Tuzo rag ujea sarko zolltolo?
47. Mhoji jinn don disanchi mhonn ugddas dhôr, mon’xakullak Tunvench rochlãi itlem osokt.
48. Sodanch jivo asto, kodinch moronam toslo monis khôi asa? Norkachea chopkeantlo konn sutton vochot?
49. Tujea visvaxiponnacher soput gheun Davidak bhasailolo, Tuzo purvincho mog khôi pavlo Saiba?
50. Hea Tujea sevokan sôslolim khebddam visrum naka, Saiba; hea onbhavarti lokachi ninda hanv kallzant gheun bhonvtam.
51. Tujech xotru, Sorvespora, khebddam kortat, veta thôisor Tujea makhloleachim khebddam korit asat. Sorvesporak dhin’vasum-ia sodankal! Amen! Amen!
