1. Tuka mhozo otmo ubartam, Sorvespora, mhojea Deva!
2. Tujer mhozo visvas hanvem dovorla; mhaka fottounk dium naka. Mhojea dusmanank mhojê voir nachunk dium naka!
3. Tujer visvas tthevtat tim kodinch fottounchim nant; jim konn dil’lem utor beporven môddtat, tinch lojek sampoddtolim.
4. Tujeô vattô mhaka vollkhum-di, Sorvespora, Tujê marog mhaka dakhoi.
5. Tujea sotachea margavelean mhaka choloun vhor, mhaka Tuji zannvai xikoi: (5b)Tum mhozo Dev, Tunch mhozo Tarôk!
6. Tuji kaklut visrum naka, Sorvespora, Tuzo purvilea kallancho môg monant dhôr.
7. (ab) Mhojê tornnê piraiechea patkancho ugddas dhôrum naka. Bogor maiêmogan mhozo ugddas kôr. (7c)Tujea bholeponna khatir, Sorvespora, (5c)dis-rat Tujer visvas dovrun asam.
8. Sorvespor boro ani ekach utracho, vatt chukloleank To margar haddta;
9. khalteank To sotachea margan choloun vhorta, durbollank Apli vatt dakhoita.
10. Tacho Korar samballtoleank ani Tacheô adnia palltoleank Sorvesporacheô vattô Soglleôch mogacheô ani visvaxiponnacheô.
11. Mhojem patok zori vhôdd, Sorvespora; Tori, tujea Nanva khatir tem bhogôs.
12. Zo konn Sorvesporachi bhokti korta taka To khoinchi vatt dhôrchi tem dakhoita.
13. Tacho otmo sontosan jietolo ani tachi sonsôt Dês bhogunk pavtoli.
14. Apli bhokti kortoleank Sorvespor Aplem Kalliz ugôddta, fokot tankam Aplea Korarachi To vollokh dita.
15. Mhojê dolle sodanch Sorvesporacher lailole asat, kiteak Toch mhojê pãi fasantle vattaita.
16. Mhojer ghal Tuje dolle, mhoji doia kôr: hanv polle eksur ani dolldiro!
17. Mhoje kallzache huske hollu kôr, mhojea tollmolleantlo mhaka nivar.
18. Mhojea attevitteancher dixtt ghal, mhoje koxtt polle, ani sogllim mhojim patkam bhogôs!
19. Mhoje dusman polle kitle! Kitlo mhojer zollta tancho dvês!
20. Mhozo jiv samball, tanchea chopkeantlo mhaka nivar. Tuka xeronna ietam: mhozo visvas nirfôll zaunk dium naka.
21. Nennttuvai ani promannikponn mhaka samballum, kiteak hanv, Sorvespora, Tujeruch patieun asam!
22. Sogllea tachea tollmolleantlo Israelak soddoi, Deva!
