1. Utth, Deva, Tujea xotrunchi duspôtt kor ! Tujea dusmanank Tujê mukhar dhanvddai !
2. Dhunvôr zoso ubun veta, toxench te-i ubun vetat; zoxem menn ujean koddhon veta, têch bhaxen Deva mukhar patkiancho bhosm zata.
3. Punn borim mon’xam Deva mukhar sontostat, anondan murgottun gaitat nachtat.
4. Sorvesporak sodgitam gaiat, Tachea Nanvachea manak stotram korat, rothar bosun kupam-voilean Bhonvtoleak êk provês-marôg korun nettoiat. Sorvespora sovem murgottun, Tachê mukhar sontosan ul’lasat !
5. Aplea povitr Ghorant ravta to Dev onath-bhurgeancho Bapui ani vidvancho Askari !
6. Eksurank Dev biddarak ek ghor dita, koidiank suttka diun sukhest korta, punn fituranchem tthikann korddi zomin.
7. Deva, jedna Tujê porjê mukhar Tum cholunk lagloi, jedna oronneantlean vatt korun fuddem geloi.
8. tedna bhuim kampli, Deva hujir mollbantlim udkam vhanvlim, hôi, Deva hujir, Israelachea Deva hujir.
9. Deva, Tujea udar bholeponnacho Tunvem boroch paus dhaddloi, ani sukun-korpun gel’lo Tuzo dês. Tunvem novean sufôll keloi.
10. Thoim, Deva, Tujea boreponnan Tujea goribank toiar kel’lem Tujê porjek bidder gavlem.
11. Sondexkarank Pormespor khobor dita: “Sorvpodvedaran vorixtt foujechi duspôtt keli. Gottheamnim tumi visov ghetat mhonno-sor
12. raza pollun vetat, fouzô pôllun dhanvtat” Ghorant bailô luttiche vantte korunk lagleô.
13. Parveanchea pakhotteam vori, teo rupean pangurleat, porzollit bhangaran tanchim pakam zhokzhoktat,
14. Salmon Porvotacher zhôddlolea borfa porim tanchim rotnam.
15. To Bashan-dongôr Devacho porvôt kai? Na, Bashan-dongôr mhollear gorvixtt porvôt?
16. Devan Aplem tthikann korunk vinchlolea dongrachi kiteak mhonn tumi beporva kortat, gorvixtt porvotamnô ? Thoim Sorvespor sodankal Aplem tthikann korun ravtolo.
17. Hozaranche hozar Devache roth: Siona thaun Pormespor Aplea povitr zagear aila.
18. Tum, Deva, unch sthanar choddun geloi, Tunvem koidi korun haddlei, mon’xank Tunvem donddak ghetlei, fiturank porian, Sorvespora, Tujea ghora vhelei !
19. Disan’dis nirontorim Devak vakhannum-ia: amchi soddvonn kortato Dev amcho bhar Apunnuch ubarta !
20. Koslo Dev amcho ! Tacheach hatant taronn asa ! Moronn ani jivit Sorvespora Devachech gutt.
21. Aplea xotrunchi tokli Dev foddun uddoitolo, patkant boddai dakhoitat tanchi kensalli tokli fôddtoloch !
22. Pormesporan utor dilam: "Bashan-thaun Hanv tankam portun haddtolom, Doriachea ponda thaun legun Hanv tankam voir kaddtolom.
23. Tedna tumi tanchea rogtan tumche pãi dhutoleat, tumchim sunnim porian dusmananchim moddim khaun uddoitolim
24. Tuzo dobajik provês, Deva, sogllim polletat, Povitr Mondirant provês korunk mhojea Devachi mhojea Raiachi mirovnnuk.
25. Mukhar choltat sodgitam gavpi, pattlean ietat vazontram vazpi, tanche modem choliô dholkim gazoitat.
26. Tumchea utsova-mellamnim Devak vakhannat, Israelachea putam-dhuvamnô, Pormesporachi stuti korat !
27. Ho polle Benjamin, nimanno bhurgo, mukhar cholta. Judachea kunvrancho kedo vhoddlo zomo, toxench Zebulon’che kunvor, Naftaliche kunvor !
28. Kollit kor, Deva, Tujem boll kollit kor, amche khatir dakhoil’lem Deva, Tujem boll kollit kor!
29. Jerusalea voir bandlolea Tujea Mondira thaun, Dôndd-korbhar gheun Tujê-xim ietole raza.
30. Ejiptak, lovheam modem lipun asa tea savzak, domkai; tea mostea paddeank ani boraborchea paddkuleank damum dovor. Tankam-i tokli bagaun rupeacho dôndd gheun ieum-di. Zhuz korun sukest zatat tea raxttranchi duspôtt kôr.
31. Ejiptant-thaun kunvor Tujê sorim ietole, Etiopiecho lôk 'Deva pav!' mhonnun Tuka hat zôddtole.
32. Prithumechea rajeamnô, Devachea manak gaion korat!
33. Mollbar, purvilea mollbar, gaddier bosun To bhonvddi marta, Aplo tallo gôddgôdd koso gazoita.
34. Cholat tôr, Devachem boll vollkhun gheiat ! Israelacher porzollta Tachi mhoima kupancher Tachi podvi !
35. Tachea povitr zagear Devachem khub bhem dista. Toch, Israelacho Dev, Aplê porjek boll ani sokôt dita. Devachem Nanv vhodd zaum!
