1. Deva, samkinch sanddun geloi Tum amkam? Tum chorvak vhortaloi team xelliancher kiteak mhonn itlo ragan zolltai?
2. Purvilea kallar Tunvench vinchun kaddloli hi porza, Tujem daiz korunk Tunvench soddoilolem hem kull, Tunvem Tujem tthikann kel’lei to Sion Porvôt: hancho tôr atam ugddas kôr !
3. Ghorttann korun uddoilolea hea zagear cholun ie; sogllea Tujea Povitr Mondiracho dusmanan vinas korun sôddla!
4. Tuji porza zomtali tea Ghorant dusman gorôz ghaltat; aplim nixannam, porkean gelim nixannam, thôi ubarun dovorleant.
5. Oslim nixannam amim kodinch dekhunk naslim!
6. Khuradd paroi tutio gheun dêsvattechea kamak lagle, far marun-marun daram sogllim foddun ghalim.
7. Deva, Tujea Povitr Mondirak tãnnim uzo lailo, Tujea Nanvak bhettoilolo zago bhoxttaun tãnnim bhosmun uddoilo !
8. Monant tãnnim oxem ievjilem “Tancho sarko vinas korum-ia” Ani vochun desant aslim titlim-i devsthanam tãnnim Iasun uddoilim.
9. Devachi koslich khunna dixtti poddonam, provadi mhonnlolo melloch nam. Kednam porian hem oxem urtolem tem konn sangtolo?
10. Kednam porian, Deva, dusman khebddam kortolo? Tuzo voiri sodankal Tujea Nanvachi ninda kortolo gai?
11. Tuzo hat kiteak ubarinãi? Tuzo uzvo hat kiteak mhonn lipoun dovortai?
12. Punn purvilea kalla thaun Dev amcho Rai, akhê prithvecher soddvonn korta to Toch!
13. Tujê podven Tunvem doria doxim keloi, doriantleam raksancheô Tunvem tokliô foddleôi.
14. Tunvench Leviathanachê tokliechi pudd korun sôddlii, ani somdirantleam orixttank tachem mas khavoilei.
15. Tunvem zhori ugôddleôi ani udkanche vhanvle gosgoxe, pun sodam-vhanvteô nodi Tunvem sukoileôi
16. Disacho ani raticho Dhoni Tum, chondrimak ani suriak tunvench nemleai.
17. Prithumecheo ximô Tunvem tharaileai, gim’ ani hinvallo Tunvench ghoddun dileai.
18. Atam, Sorvespora, hacho ugddas kôr: dusman koxe ninda kortat te polle murkh lôk Tujea Nanvacheô kenddnniô kortat.
19. Tujea parveak gidacheam davlank soddun naka, Tujê dolldirê porjek sodankal visrum naka
20. Tujea Koraracho ugddas kôr; kiteak desachea dôr-eka bhuiarant ani moidanar zulum’ korta raj.
21. Zulum’ bhôgtoleank niraxi korun soddum naka; goribank ani gorjek sampoddloleank Tujem Nanv vakhannunk favo kôr.
22. Utth, Deva ! Tuzoch man rakhunk ie, dis-bhôr budh-naslolo lôk Tuji ninda korta mhonn ugddas kôr.
23. Tuje xotru polle boball korit asat, Tujeam dusmanancho ghôllbhôll disan’dis choddot veta mhonn visrum naka !
