1. Zoi, zoi Sorvespor! Otmea mhojea, Sorvesporachi stuti kôr!
2. Jiv aso-sôr Sorvesporachi vakhann’nni kortolom, sogllê mhojê jinnent mhojea Devak gitam gaitolom.
3. Razkarbhariancher visvas dovrum naka, osokt soimbachea mon’xacher patieun ravum naka: Tuka soddounk taka tank na!
4. Prann sôddlo mhonnttôch, to babddo dhul’lintlo ail’lo dhul’lint portun veta; teach vellar soglleô tacheô manddnniô fiskottun geleô!
5. Zacho askari Jakobacho Dev, zo konn Sorvespora aplea Devacher visvas tthevta, to monis bhagi!
6. Teach Devan rochla sôrg ani prithum’, doria ani doriant asa tem sogllem.
7. Sorvespor sodanch khorea utracho, dhumallo bhôgtoleam khatir To nit korta, bhukel’leank To giras dita, koidiancheô sanklli Sorvespor tôddun uddoita.
8. (a)Sorvespor kudd’ddeanche dolle ugôddta, (8b)bagovloleank nitt ubim korta.
9. (a)Sorvespor porkeank rakhta, (9b)onath bhurgeank ani vidvank samballta. (8c)Borea mon’xanchi Sorvespor opurbai korta, (9c)punn patkianchim panvlam To ghuspaita.
10. Siona, Zo pinddkechê pinddkent tuzo Dev, Toch Sorvespor razvôtt choloita sasnnachea sasnnak!
