1. Deva, Tukach hanv vakhanntam, anink ogo ravum naka
2. noxttim naddgim tonddam mhojê virudh ugôddtat, fottkirê jiben mhojê lagim uloitat,
3. dvesacheam sobdamnim mhaka veddho ghaltat, bexttinch mhojê pattik lagleant.
4. Tancho môg kela astanam mhojer oprad manddtat, punn hanv zalear prarthon korit asam.
5. Borem kelam tem vaittan ani môg kela to dvesan mhaka farik kortat.
6. “Khotto monis tacher guneanv manddum, tacher garannem korpi tachea uzveak ubo asum;
7. tachi mon’subi zaun, guneanvkar mhonn tacher formonn poddum, tachem prarthon-ui zaum tacho guneanv!
8. “Tachê jinneche dis unne zaum, tachi zutti anink konn gheum.
9. Tachim bhurgim onath zaum ani tachi bail randd zaum.
10. “Tachim bhurgim rostear poddum, bhikek sampddum, tanchem ghor moddon poddum ani thôisorli legun tankam pollapôll gheunk poddum.
11. Soglli tachi asti savkar kaddun gheum ani tachea vavrachem utpon videxi zhombun vhorum.
12. "Konnuch tachi doia dhorinam zaum, tacheam onath bhurgeanchi konnuch kaklut korinam zaum.
13. Tachi sonsôt nas zaun vochum ani êkê pinddkê bhitôr tichea nanvacho bhosm zaum.
14. “Tacheam purvozancheam opradancho ugddas sodam togum, tachê avoichem patok bhogsonnea vinnem urum.
15. Tanchim patkam sodam Sorvespora mukhar asum, osleam patkiancho ugddas legun prithumêvelo To kaddum uddoum."
16. Kaklut korchi mhonn kednanch tachea monant ieunk nam, punn goribak ani dolldireak tannem dhumallo dilo, ani khont bhôgtoleak moro porian tannem piddapidd dili.
17. Xirap ghalunk taka borem diso: tacheruch xirap poddum. Axirvad taka naka aslo, tachê voilo axirvad vochum.
18. Xirapanchem angavlem nhesun, to xirap ghalit bhonvtalo. Tacheach angant udka vori te bhitôr sorum ani tela vori tacheam haddamnim rigum.
19. Zaum te atam tacheach angak panklolem angavlem, kaddunk nozo toslo pott’tto.
20. Mhojer garannem kortoleank, mhojer boglanttam ghaltoleank Sorvespor osli mozuri dium.
21. Tujea Nanva khatir, Sorvespora, mhoji rakhonn kôr, Tum bholo ani mogall dekhun mhaka nivar.
22. Hanv zalam gorib ani dolldiro ani mhojea horddeant kalliz mhojem kollvollta.
23. Sanjechê savllê vori hanv nanch zatam, ttolla vori mhaka fafuddtat.
24. Upas korun mhojim dhompram koddkoddtat, sukun sukun mhojem ang zalam kat ani haddam.
25. Mhojêo kenddnniô korunk mhaka dhôrla, mhaka polletat tim soglim kenddun tokli haloitat.
26. Sorvespora, mhojea Deva, pav mhaka. Tum mhozo môg kortai dekhun mhaka nivar.
27. Tuzo hat hanga asa, Tunvench hem kelai mhonn tim zanno zaum, Sorvespora.
28. Tim xirap ghalear ghalum, Tum axirvad ghal. Mhojea angar poddtat tankam lojek ghal, punn Tujea sevokak sontoxi kôr.
29. Mhojer garannem kortoleank bemanachem anglem favo zaum, lojechea avoronnan tankam guttlaun dovor.
30. Mhojeam onttamnim Sorvesporak vhoddlean dhin’vastolom, lokachê zomati modem Tachi tust kortolom.
31. Kiteak xikxê-formonn martoleanchea hatantlo durbolleak nivarunk tachea uzveak To ubo.
