1. Amkam nhoi, Sorvespora, amkam nhoi, bogor Tujeach Nanvak zoddun ghe mhoima, Tujea moga pasot, Tujea visvaxiponna pasot Tuka mhoima favo!
2. “Tumcho Dev khôi asa?" Oxem onbhavartiamnim kiteak mhonnchem?
3. Sorgar ani prithumer amcho Dev Apnnak zai tem sogllem korta.
4. Punn tancheô murti rupea-bhangaracheô, mon'xancheam hatamnim ghôddloleô.
5. Tankam tondd asa, punn vacha nam; dolle asat, pun dixtt nam
6. Kan asat khorem, aikunk mat zainam; nak asa, pun ungtole koxe?
7. Hatamnim tanchean afddunk nozo, paiamnim cholunk zainam, golleantlo kosloch avaz bhair soronam.
8. Murti kortat tim murtim sarkinch, ani tancher visvas dovortat tim-i toxinch.
9. Israelacheam putam-dhuvamnô, Sorvesporacher visvas tthevat. To amcho Adar, To amcho Rakhnnar.
10. Aaronacheam putamnô, Sorvesporacher visvas tthevat; To amcho Adar, To amcho Rakhnnar.
11. Sorvesporachi bhokti kortoleanmnô, Sorvesporacher visvast thevat. To amcho Adar, To amcho Rakhnnar.
12. Sorvespor amcho ugddas korta: To amcher axirvad ghaltolo, Israelacheam putam-dhuvancher axirvad ghaltolo, Aaronacheam putancher axirvad ghaltolo.
13. Jim konn Tachi bhokti kortat, zaum kirkoll zaum vortim, tancher To axirvad ghaltolo.
14. Tumchi ani tumcheam bhurgeanchi sonsôt Sorvespor vaddoum ani choddoum.
15. Sorga ani prithumecho Rochnnar Sorvespor tumcher axirvad ghalum.
16. Sôrg mhollear Sorvesporacho, punn prithum mon’xank Tachem dennem.
17. Morun geleant tim Sorvesporak vakhannunk xokonant: tim Norkant denvun ogim poddleant.
18. Punn ami, jivim asanv tim, Sorvesporak vakhanntanv atam ani sasnnachea sasnnak.
