1. Udenti thaun Ostomtê porian Sogtta-Sorvancho Dev, Sorvespor uloita; Prithumechea mon’xank To zomoun haddta.
2. Sobit sundôr Siona thaun To porzollta!
3. Amcho Dev ieta, To anink ogo ravcho na. Tachê mukhar êk uzo sogllem ulpaun uddoita, Tachê bhonvtonnim zhoddzhoddit tufan.
4. Aplê porjechê mon’subek mollbak ani prithvek To apoita.
5. "Iôdn korun Mhozo korar manun ghetil’lê Mhojê porjek Mhojê mukhar zomoun haddat!"
6. Dev Apunnuch nit korunk veta, dekhun mollob Tachem nitivontponn porgôtt’ta!
7. " Aik, Mhojê porjê, sangtam tem aik. Israela, tujê virudh ruzvat ditam! Hanv Dev, hôi tuzo Dev, (21c)tujer firiad manddtam, tuje guneanv tujê mukhar ghaltam.
8. Tujea iodnamnim koslich chuk Mhaka mellona, tuje hom’ bi sodanch asat Mhojê mukhar.
9. Tujea ghorantlo aniêk paddo legun Hanv magcho na, tujea hinddantle bokdde-i bi Mhaka nakat.
10. Kiteak ranam-vonantlim sogllim savzam Mhojim, ani hozaramnim Mhojea dongrancher bonvtat teô-i mon’zati Mhojeôch.
11. Mollbavelim sovnnim sogllim Mhojê vollkhichim, zomnir cholta tem sogllem Mhojê adhin asa.
12. Mhaka zôr bhuk lagli Hanv tuka sangpacho na, kiteak vosundhora Mhoji, ani ticher bhòrlam titlem-i.
13. Hanv kitem boilanchem mas khatam vô bokddeanchem rogot pietam kai?
14. Dhin’vasnnecho iôdn Devak bhettoi, Bhov Vortea Devak kel’leô angovnnô pallun di;
15. magir Mhaka akantachea disa ulo mar: Hanv tuka nivartolom ani tum Mhaka man bhovman ditolii."
16. Punn patki mon’xak Dev oso uloita: "Mhojeô adnia ucharunk tuka koxem puttvota? ani porot-porot Mhozo Korar tujea onttancher kiteak?
17. Tum tôr Mhojê Somurtichi kortai beporva ani Mhojim utram varear vochunk ditai.
18. Chorak dekhona fuddem tum tachê pattlean dhanvtai, ani porduvariam sangatim dis kaddtai,
19. khotteponn onkunk mat tondd ugôddtai, ani tuji jib peleak fosounk zalear suddsuddit halta.
20. Sust bosun tujea bhavak tum katortai, tujêch avoichea putacher boglanttam ghaltai!
21. (a)Oslim tujim kortubam, ani Hanv ogo ravcho? (21b)Tujê sarko Mhaka korun sôddtai?
22. Devachi porva korinant tim sogllim tumi, chotrai dhôrat!
23. Hanv tumkam sôddcho na, ani tumkam nivarunk konnuch aschona! Zo konn dhin’vasnnecho iôdn bhettoita to Mhaka man bhovman dita;promannik mon’xak Devachi soddvonn dakhoitolom."
