1. Sorvesporak dhin’vasat! To kitlo boro! Tacho maiêmôg mit-mer naslolo.
2. Sorvesporacheam bollixtt kortutvanchem konn vornnon korit? Konn Tachi favo toxi kirti gazoit?
3. Borea margan choltat ani sarkem tem kortat tim sogllim bhagi!
4. Tujê porjecho Tum môg kortai, Sorvespora, tôr mhozo-i ugddas kôr. Mhojê-xim ie, mhaka adar di,
5. Tunvem vinchun kaddloleanchem sukh mhaka-i bhogum-di. Tujê porjechea sontosan mhaka-i sontosbhorit kôr, Tujea daizachê vhoddvikent mhaka-i vantto di.
6. Amcheam purvozam bhaxen amim guneanv kela, amim noxtteponn kelam, ami opradi zaleanv.
7. Ejiptant astanam amcheam purvozamnim Tujeam vismitanchi porva keli nam. Kedo vhoddlo Tuzo môg, hem tim visorlim: Tambddea Doria lagim Bhov Vortea Devacher tim kolpolim.
8. Tori astanam, Apli podvi porgôtt korchê khatir Apleach Nanvak lagun Tannem tanchem taronn kelem.
9. Tambddea Doriak Tannem dhomkailo, ani doria suklo, oronneantlean vhel’le porim Tannem tankam doriantlean vhelim.
10. Dusmananchea hatantlim tankam nivarlim, voirianchea chopkeantlim tankam soddoilim.
11. Tankam dhumallo ditale tech udkant buddun gele, tanchê modlo eklo porian vanchlo nam.
12. Tednam, Tachea utracher visvas dovrun, gitam-gaionamnim tānnim Tachi stuti keli.
13. Punn rokddinch Tachim kortutvam tim visorlim ani Tachi khuxi sodinastanam cholunk laglim.
14. Oronneant apleam vondovnnianchi vatt tānnim dhôrli, zongllant Devachi porikxa korunk laglim.
15. Magtalim tem Tannem tankam dilem, magir tanchê modem bhoikôr pidda dhaddli.
16. Pennem korun ravtalim thôi Moizesacher ani Sorvesporan sonvskarlolea Aaronacher tim dusvasan portolim.
17. Ugti zaun, zomnim Datanak gill’lo ani Abiramachea pokxak aplea pottant purun dovorlo.
18. Tancho pôkx lasun uddounk êk uzo pettlo, tea agtteant soglle fitur ulpon gele.
19. Horeba-xim tannim êk paddkulo ghôddlo, koddhoilolea bhangarachê murtichi tim puza korunk laglim.
20. Aplea mhoimevont Devak soddun, tonn khatolea boilachi tānnim murti dhôrli.
21. a. Tori Devak, aplea Tarokak, tim visorlim. 21b. Ejiptant Tannem kel’lim vortim kortutvam,
22. a Khamachea desant novlam-vismitam, 22b Tambddea Doriant ojapanche chomotkar
23. Dekhun To tancho nas korunk ievjitalo; punn bhosm korunk aito zal’lo rag pelean kaddunk tanchê khatir vinonti korunk Tachê mukhar zalo ubo Moizes, Tannem vinchun kaddlolo.
24. Axel’lo dês kãi nhoi-so kelo, Tachê bhasavnnecho tānnim visvas sôddlo.
25. Ap-apleam tombumnim tim gunngunnunk laglim, Sorvesporachea utrak kan bhere korunk laglim.
26. a. Tannem Aplo hat ubarun spout ghetlo. 26b. Tednam, thôisoruch oronneant tankam xevttun uddounk.
27. a. tancheam bhurgeank raxttram modem ximpddaunk, 27b. ani vegveglleam desamnim tankam duspottavunk.
28. Pevorchea Baalachi tim seva korunk laglim, ani mel’leank bhettoil’leo boliô khaunk laglim.
29. Osleam kortubamnim thannim Tacho rag pettoilo, ani tanchê modem mari futtli.
30. Tea vella Fineias uttholo ani tannem zhôddti keli, ani tednam mari thambli.
31. Dekhun pinddkechê pinddkent nitekallim punneavont monis mhonn tachi vakhann’nni cholta.
32. Meribacheam udkam lagim tãnnim Taka tiddkailo; ani tankam lagun Moizesak-ui vaitt zalem,
33. kiteak tãnnim tachem kalliz ekdom’ dukhoilem ani to utavllaien ulounk pavlo.
34. Sorvesporan tankam nas korunk formailolem team raxttrancho tãnnim nas korunk nam.
35. Urfattem raxttram kodden lognacho sombond korun tanchê jinnechi chal apnnem dhôrli.
36. Tancheam murtinchi puza korunk laglim, heô tankam fas zaunk pavleô;
37. devcharank tim apleam putank ani dhuvank marun bhettounk pavlim.
38. Niropradi rogot tãnnim vikrailem: Kanaan'cheam murtink bhettoiloleam apleam putam-dhuvanchem rogot. Oso tãnnim soglo dês rogtan bhoxttailo.
39. Osleam kortubamnim tim bhoxttolim, pordvari zali tanchê jinnechi chal.
40. Aplê porjecher Sorvespor boroch koplo, Aplea daizachi Taka vitt disli.
41. Tankam Tannem raxttranchê adhin kelim, tanche dusmanuch tanche dhoni zale.
42. Tancheam dusmanamnim tankam dogdogailim, aplea hatachea bhara khal tankam chêplim.
43. Portun-portun Tannem tankam soddoilim, punn tim mud’dom’ Taka tiddkaitalim ani apleach noxtteponnant odik-odik buddtalim.
44. Tori astanam, tancho ulo aikotalo titlê-i pavtti, tanchea dolldirponnachi To doia kori.
45. Tanchê khatir Aplea Koraracho Tannem ugddas kelo; To bhov konnvallo dekhun, Taka tanchi doia disli.
46. tankam gulam’ kel’leanchim-i kallzam Tannem movallo-xim kelim.
47. Sorvespora, amchea Deva, amchem taronn kôr. Raxttram modlim kaddun amkam novean ektthãi kôr. Oxim ami Tujea Povitr Nanvachi stuti kortoleanv ani Tuka vakhannun amchich vhoddvi zatoli.
48. Sorvespor Israelacho Dev, sasnnachea sasnnak Tachem Nanv vhodd zaum. Ani zap diun sogllo lôk mhonntolo. “Amen, Zoi zoi Sorvespor”. Zoi zoi Sorvespor!
