1. Sorvespora, Davidacho ugddas kôr, tachea huskeam- vavrachi iad kôr:
2. Sorvesporak tannem soput dil’lo, Jakobachea Bollixtt Devak angovnn kel’li:
3. zaum tombunt zaum ghorant hanv bhitôr sorcho na, mhojê bajer add poddcho na,
4. mhojeam dolleank nhid diuncho na, mhojea paklliank diuncho na visôv!
5. Sorvesporak êk zago sôdun kaddlea bogor, Jakobachea Bollixtt Devak tthikann mell’llea xivai,
6. Efratant Arkpêtt asa mhonn ami aikolem, Iarimachea moidanar ti amkam mell’li!
7. To tthikann korta thôim ami vochum-ia, Tachea pãianchê monnoiê mukhar sorpottum-ia.
8. Tujê podvechê Arkpettê soit, Sorvespora, Tujea visovachea zagear choddun voch.
9. Tuje iadnik promannikponnan cholum ani Tuje bhokt anondan ul’lasum.
10. Tujea sevoka Davidachea moga khatir Tujea makhloleak bhair ghalum naka!
11. Tujê sonstintlea eklea tujea putak tujea xinvasonar bosoitolom: oxem Sorvesporan soput gheun Davidak utor dil’lem; dil’lem utor To môddcho na!
12. Tujea putamnim Mhozo Korar samball’lear, ani Hanvem dil’leô adnia pall’lear, tanche-i put tujea xinvasonar razvôtt choloitole nitekallim.
13. Khorench Sorvesporan Sion-xar venchun kaddlam, tench Taka zai Aplem tthikann korunk:
14. Hanga Hanv sodankal jietolom, hanga Mhojem biradd korunk Hanvem ievjilam!
15. Tancho tandull-gotto Hanv choddoitolom, tanchea goribank pott-bhôr jevunk-khaunk ditolom,
16. tanchea iadnikank Hanv odik promannik kortolom, ani tanche bhokt bhov vhodda anondan ul’lastole.
17. Thoim Davidak bollvont sonsôt Hanv upzoitolom, ani Mhojea makhloleacho ghorcho divo pettoun samballtolom.
18. Tachea dusmanank lojek ghaltolom, punn tacher Mhozo mukutt porzolltolo!
