1. Sogllea raxttramnô, aikat! Ak’khea sonvsarant ravtoleamnô,
2. barik lôk, motto kullivont lôk, grest toso gorib lôk, sogllim tumi chitan kan diat!
3. Mhoje ontt uchartat zannvaiechim utram, mhojem kalliz niallun xikoita khori vidia.
4. Voparicho ôrth sôdunk mhojem mon laitam, kin’nori vazoun parkhun kaddtam mhojem humannem.
5. Vaitta-vignachea vella, dusmananchi vikttai mhaka veddho ghalta tedna, kiteak mhonn hanv bhietolom?
6. Duddvacher asa tancho sogllo visvas, grestkai vaddlea mhonn mijas kortat.
7. Poixeamnim apli soddvonn zôddunk khoincheach mon’xak tankna, aplea jivachem mol Devak farik korunk konnacheach hatant na!
8. Mornnantlo jiv nivarunk mon’xache hat pavonant.
9. Duddu môddun-ui jivit sodankal togounk zaina, haka kosloch upaina: fonddant vetolo to vetoloch!
10. Xanno monis matiek veta, toxench piso ani murkho morun somptat; apli grestkai dusreank sôddun chol’le: hem konn-ui zanna!
11. Aplim nanvam gramank dileant zalear-ui, mon’xanchem nimannem ghor mhollear matiecho fôndd, hench tanchem sodam-togtolem biddar.
12. Monis apli grestkai sodam samballcho na, sompun vetolea mon’zatim sarko to.
13. Peleacher podvi choloitat mhonn jim konn apnnancheruch patieun asat, tanchi-i gôt hich:
14. Xelliam vori tankam lôttun dhuklun Norkant ghaltole; thoim Moronn tankam chorvak vhortolem. Sokall pavtôch tanchi suki boddai sortoli ani Norkant zatolem tanchem biradd; punn promannik mon’xank zoit melltolem.
15. Khorench Dev mhozo jiv Norkantlo vattaitolo ani mhaka Aplea gopant ghetolo.
16. Peleachi grestkai vaddot geli mhonn bhienaka; tachea ghorabeachem nanvrup choddlem mhonn kãich porva korchi goroz na!
17. Morun veta tedna kuskutt gheun vecho na, zôddil’lem nanvrup tachê pattlean fonddant kãi denvchem na.
18. Hanv mugelo sust-sukhant jielom mhonn lôk mhaka vakhanntolo:oxem to jinnent aplich vhoddvik chint’talo.
19. Punn uzvadd anink polleunche nant tea aplea purvozank to-i bi sangat korunk vetoloch!
20. Monis apli grestkai sodam samballcho na, sompun vetole mon’zatim sarko to!
