1. Sorvespora, mhojem magnnem aikun ghe, mhozo ulo Tujea kanar poddum-di.
2. Mhojea akantachea vellar Tujem tondd lipoum naka, Mhojê vinovnnek kan di; hanv ulo martam tednam vegim mhaka pav.
3. Dhunvra vori mhoje dis vetat ubun, ujea vori mhojim haddam vetat lasun,
4. Kalliz mhojem tonna vori bavlem, unddo khaunk legun ruch nam,
5. haskar-suskar soddun soddun, haddank laglea kat
6. Oronneantlê pannkolliê bhaxen hanv zalam, ghorttannant ravtolea natuka sarko distam.
7. Ratchi mhaka nid nam, pattsar boslolea eksurea sovnnea bhaxen hanv roddtam,
8. Dis-bhôr mhoje dusman mhojeô kenddnniô kortat, mhoji vakhann’nni kortale tech monis atam mhojem nanv gheun xirap ghaltat.
9. Gobôr zala mhozo gras, ani pivonn mhojem dukamnim bhôrlolem.
10. Kiteak Tum boroch koplai, ekdom’ ragar zalai; ekdam mhaka unch ubarloloi, atam zop’p-korn dhornir xevttiloi.
11. Khinn-bhôr urtolê savllê bhaxen mhoje dis, tonna vori hanv bavun suktam.
12. Punn Tum, Sorvespora, sasnnak togtai, iugachea iugak Tujem Nanv urta.
13. Utth ani Sion-xharachi doia kôr, kiteak kaklut korcho vêll pavlo, hoch to vêll;
14. karonn Tujeam chakrank tacheam chireancho ugddas porian umalle haddta, ani tachê dhulliche legun churchure distat.
16. Jednam Sorvespor Sion-xhar novean bandtolo ani vhodda dobajean dixtti poddtolo,
15. tednam raxttram Sorvesporachea Nanvachi bhokti kortolim, ani prithumeche soglle raza Tujê mhoimek man-bhovman ditole;
17. adar-nasloleanchem prarthon To aikotolo, tancheam magnneanchi beporva korcho nam.
18. Zolmunchi asa tê novê pinddken Sorvesporachi stuti korchê khatir, iugachea iugant hem sogllem boroilolem asum-di
19. Aplea unch povitr tthikanna thaun Sorvesporan voddôv ghalo, sorgar thaun prithumecher Tannem doiall nodor ghali,
20. koidianchem rudon Tannem aikolem, ani mornnachem formonn poddloleank Tannem suttka dili.
21. Sorvesporachem Nanv Sionant gazounchê khatir ani Jeruzalea modem Tachi stuti korchê pasot.
22. desam-desancho ani raxttram-raxttrancho lôk zomo zatolo ani eka tallean Sorvesporachem vondon kortolo.
23. Mhojem boll modench virun gelem; sang mhaka, kitle dis azun mhaka urleat?
24. Tum sasnnachea sasnnak togtai, tôr mhojea aukache dis bhórchê adinch mhozo jiv kaddum naka,
25. Tunvem prithum’ rochlear kallanche kall zaun gele, sôrg-ui Tujeam hatanchem kam
26. tim-sorun vetolim, Tum ekloch urtoloi; pornneam vostram vori tim kotteun vetolim, ani nhesun kaddtat team angavleam vori Tum tim kaddun uddoitoloi.
27. Punn Tum asai tosoch astoloi, Tujeam vorsank ont-par nam!
28. Tujeam sevokancheam bhurgeank sust ani xant jieunk melltolem, ani tanchi sonsôt sodankal Tujeam dolleam mukhar vaddtoli.
