1. Zoi, zoi Sorvespor! Sorvesporak novem git rochun gaiat; bhoktanchê sobhent ghonnghonnan Tachem kirton korat!
2. To aplo Rochnnar mhonn Israelak sontôs bhôgum-di; To aplo Raza mhonn Sionacheô put-dhuvô anondan ul’lasum!
3. Nach-khell korun Tachea Nanvachi stuti korum; ghumttam ani sitaram Tachê mukhar vazoum!
4. Kiteak Sorvesporan Aplê porjecho môg kelo; dubllea-dhaktteank Tannem soddvonn zôddun dili.
5. Apnnank mell’llolea zoitan bhokt sontosbhorit zaum ani khuxalkaieche ul’las sôddum; Deva mukhar sorpottun Tachi stuti korum.
6. Tanchea onttancher asum Devachi vakhann’nni, ani tanchea hatant don dharinchi torvar.
7. Onbhavarthianchem farikponn gheun ani raxttrank khast lavun,
8. tanchea razanche pãi sankllimnim bandun ani tanchea mottea-mottea mon’xanchea hatank beddi ghalun,
9. formailolea nivaddeak pallo diun, Tachea bhoktank mellta sukh ani vhoddvik! Zoi, zoi Sorvespor!
