1. Otmea mhojea, Sorvesporachi vakhann’nni kôr! Sogllea monan, kallzan ani sokten Tachea Povitr Nanvachi vakhann’nni kor.
2. Otmea mhojea, Sorvesporachi vakhann’nni kôr ani Tache upkar kodinch visrum naka:
3. Toch soglle tuje okman bhogxita, sogllea vaittak vokod dita.
4. To tujem jivit fonddantlem nivarta, tujea mathear mogacho ani konnvallaiecho mukutt ghalta.
5. To tujem jivit denneamnim bhôrta, gorudda porim tuka novean tornnê piraiecho korta.
6. Sorvesporachim kortutvam neainitichim, zulum’ bhôgtoleank To nit korun dita.
7. Moizesak Tannem Apleô ievzonnô ugteô korun dakhoileô, Israelacheam bhurgeancheam dolleam mukhar Aplim vismitam fankoilim.
8. Sorvespor konnvallo ani maiêmogacho, Tacho rag sottkornn pettonam, Tachem Kalliz kakluticho tthevo.
9. Tacho krôdh sodam urta toslo nhoi, To sodankal rag dhorun rauncho nam.
10. Amcheam patkank favo tea mapan To khast lainam, amcheam guneanvanchem favo tem farikponn maginam.
11. Prithumê poros sôrg jitlo unch-unch asa, titlo vhôdd Tachi bhokti kortoleam thái Tacho môg
12. Udent ani Ostomt jitleô ekameka thaun pois-pois asat, titlim pois To amchim patkam kaddun uddoita.
13. Zoso bapui apleam bhurgeank konnvallaien vagoita, tosoch Sorvespor Apli bhokti kortoleanchi doia dhôrta.
14. Amkam kiteachim rochleant tem To bês-boro zanna, ami fokot dhull-mati mhonn Taka ugddas asa.
15. Mon’xache dis tonna sarke, xetantlea fula vori to fulta,
16. Varem ailem, ani to babddo ubun gelo, zôi aslo thöi anink dixtti poddonam
17. Punn Apli bhokti kortoleam thái Sorvesporacho môg togta sasnna thaun sasnnak; Tachi doiamoia pinddkechê pinddkent.
18. ani Tacho Korar samballtoleam thái ani Tacheô adnia ugddasan palltoleam thái
19. Sorvespor sorgar Aplea thir xinvasonar bosun Aplem raj somestancher choloita.
20. Devacho hukum’ palltoleam, Tachem utor aikotoleam, bollvont ani podvedar dutamnô, soglle tumi Sorvesporachi vakhann’nni korat.
21. Soglleam Tacheam dolbharamnô, Tachi khuxi palltoleam Tacheam sevokamnô, Sorvesporachi vakhann’nni korat.
22. Soglleam Tacheam rochnnamnô, zôi-zôi Tachi razvôtt cholta thôi Sorvesporachi vakhann’nni korat, Otmea mhojea, Sorvesporachi vakhann’nni kôr!
